Hrappur

Mér finnst þessi vera sá allra sætasti. Hann er svo mikill karakter og algjör óþekktarangi, en samt svo blíður og góður.

Kökur

Kökur eru eitt mitt helsta áhugamál. Veit fátt skemmtilegra en að baka og skreyta kökur.
Hér eru nokkrar sem ég hef gert..

Símablogg..

Er komin með blogger í símann. Haldiði að það sé munur!

Set inn mynd af litla hundabarninu mínu með uppáhalds leikfangið sitt. Plútó!

If your dreams don't scare you, they're not big enough..

Var svo glöð þegar ég heyrði þessa setningu um daginn. Ég er nefninlega svo skíthrædd við mína drauma að mig langar mest að hætta við allt saman og verða bara stöðnuð húsmóðir hér á Hjara. En það þýðir ekkert og nú er best að horfast í augu við þetta allt saman og stíga eitt stórt skref út fyrir þægindahringinn. Hlýt að geta það með þessi orð í farteskinu :)

Frænkur

Fæ þessar frænkur til mín í pössun í ágúst því foreldrar þeirra eru að fara í brúðkaup hérna á Hjara veraldar. Við JP ætlum að dúllast með litlurnar á meðan. Hötum það ekkert og erum búin að plana allskonar þó ég viti að Auður er góð ef hún fær að hitta Hrapp og borða köku og Björg verður örugglega bara hress ef hún fær pela og dót að slefa á.
Verður gaman að fá Gumma og Kristínu í heimsókn líka - eins gott að taka það fram ;)

Mynd frá Kristínu

Hárvangaveltur

Ok, er ekki enn búin að finna útúr þessu með myndirnar, þarf kannski bara að fá mér tölvu. Langar í hvíta Macbook, (sé enn eftir að hafa ekki keypt mér þannig 2007 þegar ég keypti mér HP tölvu sem entist í tvö ár) en skilst að svoleiðis sé ekki í boði lengur. Get allavega sagt ykkur að ég fæ mér lítinn krúttlegan makka. En að öðru. Er búin að vera velta fyrir mér hárvörum. Þurrsjampó: er þetta algjör snilld og hvaða merki er best? Sléttujárn: ég ælta að fjárfesta í einu góðu, er með eitt frá Tigi í sigtinu en datt í hug að heyra frá ykkur áður en ég punga út fyrir því ef það skildi leynast einhver önnur snilld þarna úti. Annars er ég svo trygg Tigi að ég ætti að vera á prósentum hjá þeim. Við JP notum hárvörur frá þeim og Hrappur litli líka - enda lyktar hann eins og bláberjamöffins alla daga ;) Ipad vill ekki leyfa mér að hafa greinaskil í færslunum mínum, svo það verður bara að vera eins og ég skrifi allt í einni runu..

Ætlaði að koma með svaka myndablogg en iPad og blogspot virðast ekki vera vinir svo ég verð bara að sína ykkur (efast reyndar um að það fari margir hérna um þessa dagana) fínar myndir seinna. Annars á ég tvo tíma eftir af (fimmtu!) næturvaktinni og er þá komin í tveggja daga frí og spáin er góð. Halló sólgleraugu, spf 30 og Yrsa Sigurðardóttir! Ps - er komin á bloglovin, örugglega bylting fyrir stóra lesendahópinn minn :)

Bloggarinn mikli fra Kasmír

Ég fæ seint verðlaun fyrir að vera virkur bloggari en fæ kannski smá kredit fyrir að reyna og koma af og til með miklar yfirlýsingar um meira og betra blogg :)
 En að öðru og fallegu, mig hefur lengi langað í nafnahálsmen en aldrei fundið neitt sem hefur heillað mig, þau eiga til að vera svo klunnaleg. En ég rambaði inní Hringu á laugavegi um daginn og sá þar þetta hálsmen sem mér fannst hæfilega fíngert fyrir mig. Myndi reyndar vilja gyllt og bara hafa Kristínar nafnið, held að 'KristínAlma' sé of mikið. Nú þarf ég bara að bíða eftir góðu tilefni til að panta það og önnur tilefni til að geta verslað mér margt annað fallegt í þessari búð. Ég er víst algjör lumma að vilja fá svona hálsmen núna þar sem þetta var í tísku fyrir nokkrum árum en mér finnst þetta fallegt - enda ber ég alveg einstaklega fallegt nafn ;)
 Talandi um nöfn þá á ég gullarmband með nafninu mínu sem ég fékk í skírnargjöf fyrir ansi mörgum árum. Mig langar að láta setja lengri keðju í það - mælið þið með einhverjum góðum gullsmið sem er hægt að leita til með svoleiðis? (já ég ætla að eiga armband og hálsmen með nafninu mínu!)
 Mikið er þetta skemmtileg færsla...

Gamalt Iittala

Fæ stundum að gramsa í geymslunni hjá ömmu og afa. Oft hægt að finna allskonar fjarsjóði þar. Datt heldur betur í lukkupottinn um helgina þegar amma gaf mér gamlan Iittala vasa. Mér finnst hann voða fínn, þarf bara að þvo hann með lopasápu, setja í hann blóm og þá verður hann sko eins og nýr :)

Gamlar myndir

Þessi mynd er einmitt tekin rétt eftir að ég borðaði bílinn...

Iittala

Fallegir hlutir frá Iittala sem mig langar í (ég á afmæli í næstu viku). Ég er reyndar alveg Iittala sjúk, held ég hafi ekki séð hlut frá þessi merki sem mér finnst ekki flottur. Vildi stundum að ég væri að vinna í verksmiðjunni við að setja litla rauða miða á þessa dásamlegu hluti.

Kaffið getur bara ekki bragðast illa í svona múmínmömmubolla

Festivo stjakarnir eru bara fallegir. Tengdamamma mín á svona stjaka frá því hún byrjaði að búa fyrir "nokkrum" árum. Svo gaf hún mér minn fyrsta festivo stjaka núna um jólin. Er sko byrjuð að safna þeim núna :)

Alvar Aalto vasarnir eru ótrúlega fallegir. Túlípanar eru sérlega fallegir í svona vasa. Verst að ég á mjög erfitt með að ákveða mig hvernig lit ég vil

Flottur bakki, ég elska bakka

Litlir lampar á lækjarbakka..

Ég er alveg ótrúlega laumu skotin í þessum lömpum sem fengust í Kisunni hérna í "denn". Fást víst núna í GK Reykjavík - kannski maður ætti að fara þangað og kíkja á þessi krútt. Veit samt ekki hvort mér finnist þetta vera eitthvað sem ég myndi kaupa og hafa í stofunni, en þeir eru alveg dásamlegir inní barnaherbergi. Ef ég ætti börn þá væri sennilega heill her af bömbum og sveppum í herberginu hjá þeim. Kannski Hrappur fíli svona lampa... ;)

Fín kanína

Auðvitað fann ég frosk, mjög viðeigandi

Sveppur myndi sóma sér vel í glugga

Ég er með uglusýki, sjáið bara þessa fallegu snæuglu :)

Bambi litli

Myndirnar eru fengnar í láni hjá google.

Endurvinnsla

Sá þetta hér um daginn hjá þessari nýju spreyvinkonu minni og fannst þetta frábær hugmynd. Ég var með krukku undan ilmkerti sem ég var búin að þvo og langaði að nota í eitthvað en vissi ekki alveg hvað. Svo datt mér í hug að blúnduspreyja krukkuna og nota sem sprittkertastjaka.

Þannig að ég fann til krukkuna góðu.

Fann svo til blúndubol sem ég átti og var frekar lítið notaður, skil það ekki.. :)

Tróð krukkunni í ermina, klippti til og bjó mig undir að skokka útí bílsskúr að spreyja. En..

Svo var þetta eitthvað bara svo sætt saman að ég ætla að hafa krukkuna með blúnduerminni á í smá tíma. En engar áhyggjur, þetta verður spreyjað - bara svona þegar ég nenni að fara útí kalda bílskúrinn minn :)

Gamalt verður nýtt

Ég er sjúk í uglur. Finnst þær eitthvað svo fallegar og auðvitað viskulegar. Mér áskotnuðust þessar litlu krúttuglur fyrir ekki svo löngu en vissi ekki alveg hvað ég gæti gert við þær - fílaði ekki alveg litinn á þeim. Þær voru með rauð augu þegar ég tók þær að mér en ég var nú búin að tússa með svörtu yfir það :)

Skellti þeim á gamla mogga sem ég var búin að breiða út á eldhúsgólfið - bílskúrinn henntar sennilega betur í svona verkefni en hann var svo fullur af bíl að ég nennti ekki að vesenast þar fyrir þetta smáræði. Smá svart sprey og voila!

Allt annað að sjá þær greyin. Nú fá þær líka að kúra á einhverjum góðum stað þegar þær eru orðnar þurrar :)

Nýtt upphaf?

Komst inn á blogger í annari tilraun. Myndi segja að það væri afrek þar sem ég hef ekki farið hérna inn síðustu 9 mánuði eða svo.

Veit ekki hvort ég kunni enn að blogga, en ætla að reyna.

Héðan af Hrannarstígnum er allt í góðum gír. Húsbóndinn vinnur fyrir heimilinu með því að veiða fisk útá sjó 5-6 daga vikunnar, ég sjálf er að vinna á dvalarheimili og í Lyfju ásamt því að hugsa um Hrapp litla, sem við fengum um jólin síðustu. Hann er vissulega hundur en heldur sjálfur að hann sé mannsbarn, gæti mögulega verið því við foreldrarnir höfum tekið þessu nýja hlutverki okkar af aðeins of mikilli alvöru og hugsum um grey hundinn eins og um kornabarn væri að ræða.

Verður spennandi að sjá hvort að ég hendi inn annari færslu á næstu 9 mánuðum. Stay tuned.

Hrappur

Sveitin

Áður en ég fór á Þjóðhátíð núna um verslunarmannahelgina þá keypti ég mér gúmmítúttur á Blómsturvöllum. Ég lét ekki sjá mig í öðrum skófatnaði alla helgina og var alltaf heit og þurr á fótunum (skiptir höfuð máli í svona útihátíðarleik).
Núna í þessari viku er svo búið að vera bilað veður hérna í sveitinni, haustið að stimpla sig inn með tilheyrandi rigningu og sunnanátt svo kuldaskræfan ég þorði ekki annað en að rífa fram tútturnar og ullarsokkana. Í góðri trú hélt ég að þessi sveitamannaleikur minn myndi falla vel í kramið hjá heimamönnum og ég myndi jafnvel eignast vini útá þetta uppátæki mitt, þar sem fólk sæi nú að ég væri kannski ekki svona mikið borgarbarn í raun og veru. En neiii, fólk hefur hlegið að mér í viku! Hér ganga allir greinilega bara um í hátísku skóm og fólk heldur að gúmmítúttur séu bara eitthvað ofaná brauð.
Meira að segja tengdamóðir mín sá tútturnar í forstofunni og sagði: Er Gísli Einarsson í heimsókn?

Hver er svona lítil og löt?

Essasú, essasú?

Já, skólinn er byrjaður og kannski kominn tími til að endurvekja froskinn. Það er jú klassískt að eiga bloggið að þegar verkefnin fara að hlaðast upp.

Ég hef samt ekki nógu mikla heimavinnu til að nenna að blogga mikið núna.

Tjá

Jæja, hvar á maður nú eiginlega að byrja?
Tíminn flýgur áfram og ég búin að vera Íslendingur í 3 mánuði, sem segir okkur það að það eru 3 mánuðir þangað til ég kemst inní sjúkrakerfið. Sem betur fer hefur ekkert stórvægilegt komið fyrir mig þessa 3 mánuði en ég hef þurft að fara til heimilislæknis tvisvar og einu sinni til sérfræðings útaf þessari hrottalega skemmtilegu blöðrubólgu sem var að hrjá mig hérna í vetur og er um það bil milljónkalli fátækari. Núna er einmitt komin upp sú staða að ég þarf að fara til tannsa að láta rífa útúr mér fjóra jaxla og ég er næstum því komin á það að bíða með það í þrjá mánuði í viðbót til að þurfa ekki að leggja út fyrir annari milljón. Gaman gaman.
Annars erum við hress hérna í firðinum fagra. Höfum það ótrúlega gott í kreppunni og ekki yfir neinu að kvarta. Jú, nema kannski húsnæðisleysi, en íbúðin sem við vorum að leigja var seld ofan af okkur og núna kúldrumst við í kjallaranum á 350 fermetra húsinu sem elsta systir hans Jóns Péturs á. Doldið svona í anda Fritzl - fyrir þá sem hafa svoleiðis húmor. Neinei, væsir sko ekki um okkur hérna í kjallaranum á Eyrarveginum, enda erum við núna með svaka gott internet og allar hugsanlegar sjónvarpsstöðvar sem við höfðum ekki áður svo nú er atvinnuleysinginn bara komin inní nágranna og glæstar svo Eva greyið losnar ekki við okkur í bráð :)
Ég er ennþá gjöööðveikt dugleg í ræktinni. Keyri útí Ólafsvík 5 sinnum í viku til að fara í spinning og BodyPump. Er alveg orðin helköttuð og tönuð í drasl - eða þannig. Það skeður víst lítið ef maður fer heim eftir spinning og étur súkkulaði sem nægir ofaní heila afríkuþjóð. Maður fær nú samt sem áður prik fyrir að hreyfa sig myndi ég halda..

Jæja, fleiri fréttir koma síðar, vonandi. Gamla er að fara í sitt fyrsta framhaldsskólapróf á íslandi í lífinu og það í Íslensku takk fyrir. Danmerkurdvölin hefur ekki haft góð áhrif á málfræðikunnáttu mína get ég sagt ykkur svo það er spurning hvort maður taki þetta fyrsta framhaldsskólapróf á íslandi með trompi og skítfalli bara líka.

Lifandi

Verið stillt inná froskinn á næstu dögum.

Aldrei að vita nema ég hendi bara í eina færslu svona í allra nánustu framtíð...

Ammó

Það má þakka fyrir að ég hafi munað passwordið hingað inn. En úr því mér tókst að skrá mig inn og í tilefni þess að það er tæpur kukkutími eftir af tuttugasta og fyrsta afmælisdeginum mínum held ég bara að ég hendi í eina færslu.
Ég er sem sagt alflutt heim og líkar vel í Grundó. Er mest í því að vera í fæðingarorlofi - barnlaus þó, en svo er ég líka búin að vera ð leysa af á dvalarheimilinu og í Lyfju svona þegar vantar. Það er nú bara líka nóg að gera, því ég er líka í skóla svo maður er líka eitthvað að rembast við að læra. Þegar ég er ekki að vinna eða læra þá þvæ ég þvott, baka og fer í ræktina (til að brenna skinkuhornunum og kanilsnúðunum).

Annars líður mér bara vel. Búin að eiga góðan tíma í Grundó, fíla það mjög vel að búa þarna - en held ég væri nú ekki þar ef að ég ætti ekki svona dásamlegan Grundfirskan kærasta (og nú geta þeir sem þola ekki væmni mega æla núna). :)

Þetta verður ekki lengra að sinni, ég er farin uppí rúm enda verður ræs hérna á Tryggvastöðum klukkan 0800 - hún Auður litla er víst ekki mikið fyrir að sofa út..

Nótt

Dáldið skondið að ekki einu sinni foreldrar barnana á myndnum kommentuðu á þær.. Við erum kannski bara svona ljót.

Ég er komin í Grundó. Er svona að venjast tilhugsuninni að ég sé ekki að fara út aftur. Fékk mikið hræðilegt þegar ég kvaddi mömmu og var með stein í maganum alla leið til Íslands eða þar til ég sofnaði í flugvélinni og var nánast vakin þegar okkur var hennt frá borði.
Okkur finnst báðum eins og það sé frí bara, því ég hef alltaf komið í frí heim eða um helgi þannig að það er pínu spes að það sé ekki þannig núna!

Á morgun fer ég að tala við skólann. Pínu skerí. Vona að mér verði hleypt í einhverja áfanga svo ég verði ekki ALVEG aðgerðalaus þangað til ég byrja að vinna. Verður nú örugglega voða fínt bara.

Ég er andvaka. Sofnaði fyrir tólf í kvöld og vaknaði svo bara hress klukkan 3. Um 4 nennti ég ekki að bylta mér lengur inní rúmi og fór fram. Er þar ennþá að deyyyyja úr hungri. Aldrei þessu vant er allt stútfullt af mat hérna og ég með valkvíða.
Ætli ég skríði ekki bara uppí aftur...

Mont

Langar að vera montrass og sýna ykkur hvað ég á ógeðslega fín og falleg systkini.

Vilborg Unnur, Sigríður Soffía, Ingibjörg Elín

og Eyjólfur

Sindri, Salka og Katla

Núna skiljiði af hverju ég er gjaldþrota eftir jólin :)

Jón Pétur varð pínu abbó útí McDreamy skilst mér svo ég verð að sjá sóma minn í því að blogga um eitthvað annað en fallega karlmenn. Þó ég væri alveg til í að spjalla svolítið um atvinnumennina okkar..

Síðan ég bloggaði síðast hefur nú ekki neitt voðalega mikið skeð, þannig lagað. Móðir mín er reyndar einni háskólagráðu ríkari. Er voða stolt af henni að sjálfsögðu :)
Hrossanesið er annars búið að vera hálfdautt í janúar vegna próflesturs, en það stendur þó til bóta og ég væri nú alveg til í að fá eitt gott HEKKEN djamm á næstunni - spurning um að rigga einu slíku upp bráðum?

Annars er ég bara öll í andlega undirbúningnum fyrir flutningana. Ég er amk búin að vera meira í því uppá síðkastið, heldur en einhverju pakkiríi. En hef engar áhyggjur, þessari búslóð er sko leikandi hægt að pakka niður á 2-3 tímum og drösla uppí samskip á öðrum klukkutíma svo það er ekki mikið stress í gangi hér frekar en fyrridaginn.
Ég hef mestar áhyggjur af því að ég nái ekki að fara nógu margar ferðir í H&M áður en ég kem heim og að ég nái ekki að kaupa allt sem ég ætla að kaupa áður en ég kem.
Jón Pétur er líka að undirbúa sig fyrir flutningana. Var ekki lengi að ráða sig í aðra vinnu eftir að við ákváðum að ég myndi flytja heim og er núna farinn að þjálfa fótbolta eins og enginn sé morgundagurinn. Hvort það sé bara útaf því að ég sé að koma eða útaf því að ég er svo "dýr í rekstri" veit ég ekki, kemur í ljós hvað ég verð dugleg að eyða í Grundó ;)
Ég sjálf er ekki komin með vinnu, en það kemur allt með kalda vatninu. Ég verð bara "stöðnuð húsmóðir" í Grundarfirði eins og mamma hennar Ásdísar Rán myndi segja. Fílaða.

Jæja. Ætli það sé ekki kominn tími á svefn hérna megin. Er víst búin að lofa mér í að hjálpa Írisi og Garðari að flytja á morgun og Svanhildi hinn daginn svo það er best að ég fari að safna kröftum fyrir það :)

Sjáið þessa fegurð..

Í þetta skiptið eru það ekki ungbörnin sem ég hrífst af.
(Er reyndar ekki að fíla þennan hring og þessi börn þarna..)

Ég viðurkenni það líka alveg fúslega að ég dró greyið Jón Pétur með mér á The made of honor til þess að ég gæti átt góðar 90 mínútur með ehm.. þeim :)
Ógeðslega leiðinleg mynd. En fallegur maður.

Froggie fer í frostið..

jiminn, þetta er nú ekki hægt. Fór að horfa á Greys og er búin að grenja úr mér augun. Þátturinn þegar Denny dó.. Need I say more?
Best að þurrka tárin samt, ég er a fara til mömmu í mat nefninlega. Skemmtilegra að vera ekki útgrenjaður þar..

Annars var ég að koma frá Vejle. Fór í gær til Svanhildar minnar í mat og hvítvín. Ótrúlega gott pasta og miiiiikið slúður. Veiii alveg það sem ég þurfti eftir að vera búin að rotna heima hjá mér í tvær vikur. Kjöftuðum útí eitt. Svo var klukkan alveg óvart að verða 5 og við ákváðum að skríða uppí rúm. Töluðum reyndar bara áfram þar. Pínu óstöðvandi. Búnar að plana feitt partý í Grundó í sumar og svona ýmislegt ;)

En að máli málana. Ég er að flytja til Íslands!
Ég er og hef alltaf verið snillingur í að tímasetja hlutina rétt og fer nú ekki að breyta því neitt núna. Flytja heim í miðri kreppu. En það er víst ekki kreppa í Grundarfirði. Enda nafli alheimsins og allt það.

Ástæðan fyrir flutningunum eru tvær, báðar frekar augljósar myndi ég halda.
Ég er ekki markaðsfræðingur í eðli mínu, eins sjokkerandi og það nú hljómar. Sé ekki ástæðu til að pína mig hérna áfram í gegnum þetta nám þegar áhuginn er núll og hugurinn alltaf í Grundarfirði. Þó að ég fái einhverja gráðu að þessu loknu þá er það bara alls ekki þess virði, því ég mun aldrei nenna að vinna við þetta.
Ætla að fara heim og finna út hvað ég vil gera.

Óskar frændi minn á afmæli í dag. Vil óska honum til hamingju með það! Man því miður ekki hvað hann er gamall, hætti að telja um það leyti sem hann varð eldri en sólin :)

Eftirsótt..

Ég virðist aldeilis vera vinsæl þessa dagana. Svoleiðis velta inn gylliboðin að ég veit bara ekki hvernig ég á að haga mér. Byrjaði ósköp saklaust. En eftir að ég fékk þessi skilaboð á Facebook eitt kvöldið þá finnst mér þetta vera komið úr böndunum..

Shannon commented on your status:
"Hey there my name is Shannon.. i was looking over your profile and i think your really sexy.. i would love to chat ang get to know you better drop me an email and we can chat my email address is shannon05@asgnoova.com "

Ég íhugaði um stund hvort ég ætti ekki bara að byrja að spila með hinu liðinu. Var ekki lengi að átta mig og sjá hvert hlutskipti mitt væri í þessu lífi þegar ég sá þetta á vísi.is : http://visir.is/article/20090109/LIFID01/123093967/-1

...

Sjitt.
Ég var búin að ákveða að koma bara um páskana til Íslands. Hugsaði að það væri stutt í páskana, tæki skólann með einhverju í líkinu við tromp þangað til og fengi svo gott páskafrí. Var ákaflega góð hugmynd þangað til ég kíkti á dagatal..
Páskadagur er 13 apríl! Sem sagt í viku 16! Við erum sko í viku 2 núna, takk fyrir pent.

Greinilegt að það var ógeðslega góð ástæða fyrir aðskilnaðarkvíðanum mínum. Ó yndislega fjarsamband. Jæja, þýðir víst ekki að væla yfir þessu, maður valdi þetta sjálfur.

Próflestur gengur. Bara gengur. Það er betra en að hann gangi ekki neitt en kannski verra heldur en ef hann gengi vel. Ég sit á bókasafninu og er svona að hrökkva í gang. Ótrúlegt hvað ég er lengi að asnast í gang. Reyndar læri þá fram á nótt en mér er sama. Væri alveg til í að vera gaurinn sem sprettur upp úr bælinu við fyrsta hanagal og er mættur í skólann korteri seinna og er þar til 17.00.
Mig langar líka að vera þessi sem borðar alltaf hollan og góðan morgunmat, þessi sem getur ekki lifað án líkamsræktar, finnst súkkulaði ógeð og mætir í kirkju á sunnudögum. Og þessi sem á nóg af peningum.
Svona er lífið. Heyrði reyndar einhversstaðar að það tæki mann 21 dag að breyta svona venjum. Gera hlutinn í 21 dag og þá ætti maður að vera orðinn háður.. mesta sem ég get er ein vika...

Ég er hálf rotin heima hjá mér í náttbuxum og með hárband. Ofsa töff. Læri fyrir próf, eða þykist gera það en er líka ofsa dugleg við að finna mér annað að gera.

Það hefur líklega aldrei verið eins hreint hérna og er núna. Ekki rykörðu að sjá, ekkert leirtau í vaskinum og nánast tóm þvottakarfa. Hér er kveikt á kertum á hverju kvöldi, því ég held að það hjálpi mér við það að læra - nema núna eru kertin að verða búin og ég þarf einhvern til að fara í IKEA fyrir mig og kippa með eins og nokkrum pökkum.

Mynduð þið ekki líka segja að það væri alveg bráðnauðsynlegt að greiða sér svona í próflestri? Mér tókst í það minnsta að telja mér trú um að þetta væri lykillinn að velgengninni..

Annars gengur fínt. Eða sæmilega. Skammdegisþunglyndið alveg að fara með mig. Ég var búin að finna dálítið gott orð á þetta, en man ekki lengur hvað það var. Versta er að ég fíla þetta skammdegisþunglyndi alveg í ræmur. Sofa bara útí eitt og vera bara inni í hlýjunni.. Alveg ég.

Be careful what you wish for..

Ísskápurinn hérna hefur alltaf verið afspyrnu lélegur. Svo ég tala nú ekki um frystinn, sem er þannig að maður getur ekki einu sinni átt ís, hann lekur bara útum allt. Líklega betra að geyma ísinn í hitaskáp heldur en í frystinum mínum.
Daginn áður en ég fór til Íslands sló út rafmagninu og að sjálfsögðu afþýddist? ísskápurinn (þetta var um nótt og ég var ofsa glöð að stíga í poll þegar ég vaknaði..) og ég tók hann bara úr sambandi þegar ég var búin að þrífa hann og stakk honum svo í samband þegar ég kom út aftur á Nýársdag.
Vaknaði svo í gærmorgun til að fara í skólann, ætlaði að grípa með mér kók og jógúrt og þetta var það sem blasti við mér!




















Ég get sem sagt átt ís núna, og ekkert annað!

Ætla að bjarga ykkur frá jólakortaumræðunni. Eins og þið hafið tekið eftir þá tókst ekkert voða vel að fá það í gegn að senda fyndin, hipp og kúl jólakort í ár. Nema auðvitað þið séuð bæjarstjóri Grundarfjarðar eða einhleypi skrifstofustjórinn, þá urðuð þið líklega vör við kort með mynd af kirkjunni í Grundarfirði. Hipp og kúl, segi ég og skrifa!
Við þökkum samt kærlega fyrir öll yndislegu kortin sem við fengum frá ykkur. Þau fóru öll með tölu uppá vegg og hanga þar enn. Munu líklega vera þar þangað til jólakort 2009 fara að berast. Á næsta ári sný ég vörn í sókn og sendi ykkur falleg og fyndin kort.

Ég er komin til DK aftur, heil á húfi eftir ótrúlega góða dvöl á Íslandinu góða.
Aðskilnaðarkvíðinn var alveg hræðilegur í þetta skiptið. Var með kökkinn í hálsinum og tárin í augunum í viku. Persónulegt met. Er nú samt öll að koma til núna, nema þegar ég fattaði að ég hafði gleymt öllu íslenska namminu sem ég keypti í krónunni. Djís hvað ég varð pirruð. Ætlaði að eiga þetta í prófatörninni til að halda geðheilsunni. Núna er ég gráti nær og sakna Nóa konfektsins ógeðslega mikið. Verð víst bara að láta Haribo viðbjóðinn duga, bið bara fólk að forðast mig eins og heitan eldinn þangað til 15 janúar. Er stygg.

Bauð mér í föstudagspizzu til mömmu í gær. Það var samt reyndar bara útaf því að Gúmmípabbi flaug til Doha í Qatar í nótt og því óvíst hvort við sjáum hann aftur, þannig að það var famelíustund í gærkvöldi...
Við erum öll voða spennt og hlökkum mikið til að eyða sumrinu á sólarströnd í Doha (vonandi)!

Annars er bara próflestur að hefjast og allir á haus í skólanum. Voða gott að vita að maður er ekki einn að standa í prófum í janúar. Ég er samt ofsa dugleg við að finna mér eitthvað annað að gera heldur að en lesa en þetta er samt allt að koma hjá mér. Ég hef mestar áhyggjur að ég verði felld/lækkuð um einkunn fyrir dönskuna mína, enda tala ég ekki einhverja hæstaréttardönsku þó ég kunni að segja aðeins meira en for helvede og bolle.
Hlýtur að hafast á endanum.
Ætti kannski að fá peysuna sem JP fékk í jólagjöf lánaða. En á henni stendur einmitt "þetta reddast".

Það eru myndir frá Íslandi á Fésinu. Þið sem eruð skráð þangað getið skoðað, en aðrir ekki held ég.

Jólakortadrama

Jæja, kom svo í ljós að Jóni Pétri finnst hallærislegt með meiru að við förum að senda út jólakort saman. Þeir Ross eiga greinilega meira sameiginlegt en ég hélt, því ég er löngu komin með lykla af íbúð og bíl.
Ég stakk svo uppá að við myndum senda út kort með mynd af bílnum hans (Rottunni* sem hann keypti sér sem vinnubíl og er búin að eyða öllum sínum frítíma í að dúlla við síðan) svona sem málamiðlun. Honum fannst ég ekki fyndin.

Annars eru bara 4 dagar í heimferð. Fer ekki vestur fyrr en 20 des ca. því ég er að fara að hjálpa Þórdísi aðeins í Friis og co. Gaman að því.
Svo það ætti að vera tími til að hitta einhverja í Reykjavíkinni.

Jól

Gott að ég "kem frá" Grundarfirði. Samkvæmt þessu er nefninlega bara snjór í Ólafsvík. Örugglega sól og blíða í Grundó eins og vanalega.

Það er annars sól hjá mér. Í alvörunni sko. Eða var í dag að minnsta kosti. Núna er bara myrkur, enda klukkan að verða hálf þrjú. Ég bara datt í smá les og er núna að plotta smá með Villa Mágkallinum mínum á msn. Erum svo flippuð.

Búin að ákveða hvar jólin verða. Þau ætla að vera í Grundarfirði þetta árið, nánar tiltekið á Grundargötu 69. Verðum bara tvö heima (ég og Jón Pétur) í megakósí rólegheitum. Fólk er nú eitthvað að hafa áhyggjur af því að það verði einmannalegt hjá okkur og svona, en ég hef nú enga trú á því. Ég er nefninlega skemmtilegri en margir halda.
Hinsvegar held ég að við getum alveg ákveðið núna að við verðum með annari hvorri stórfjölskyldunni á næsta ári, þar sem ég hef fengið það stórkostlega hlutverk að sjá um jólamatin.
Er að pæla í að biðja einhverja í tengdafjölskyldunni að hafa ríflegt í jólamatinn því það mun verða mjög líklegt að við birtumst á tröppunum hjá þeim, sársvöng eftir að mér tekst að klúðra hamborgarahryggnum á einhvern skemmtilegan hátt, sem á ekki að vera hægt.
Við ætlum svo að koma í bæinn á jóladag og soga í okkur smá menningu. Eða menningu og ekki menningu, ætlum í hangikjöt og laufabrauð á S1 og örugglega slatta af jólaboðum.
Og passa Auði krúttrassgat á annan í jólum.

Áramótin eru óráðin. Ég á flug klukkan 8.00 á nýársmorgun svo það er spurning hvað við gerum.

Í sambandi við jólakort. Þá má senda það bara strax til Grundarfjarðar (ef þið ætlið að senda mér/honum/okkur jólakort yfir höfuð), þar sem ég fer til Íslands eftir viku og verð ekkert aftur í Danmörku fyrr en í janúar.

Jón Pétur Pétursson
Kristín Alma Sigmarsdóttir
Grundargata 69
350 Grundarfjörður

Það er ennþá óráðið hvort þið fáið jólakort frá mér/okkur. Ég er að reyna að fá Jón Pétur til að senda út kort með mynd af okkur með jólasveinahúfu. Gengur ekki vel. Skil þetta ekki :)

Eigið góða aðventu, elskin mín!

Ekki fyrir löngu, á mælikvarða jólanna, kom uppá svolítið vandamál.

Jólasveinarnir voru flestir komnir til byggða að sinna sínum uppáhalds erindum. Í helli sveinanna voru hins vegar veikindi og kertasníkir sem síðastur kemur á aðfangadag gekk illa að fá aðstoð við að undirbúa sig til ferðar.

Það styttist í að sveinki þurfti að drífa sig af stað, hann var orðinn frekar stressaður. Grýla kom í heimsókn sem hafði ekki önnur áhrif en að stressa sveinka enn meira upp. Hinir bræðurnir höfðu tekið vélsleðana semvoru í lagi og sá síðasti var bilaður. Hreindýrin voru uppi við Kárahnjúka og hreindýrasleðinn hafði ekki fengið neitt viðhald í 17 ár.

Með nokkurfarlama hreindýr, fyrir sleðanum, sem ekki nenntu í burt fór sveinki aðhlaða á sleðann sem brast undan þunganum og allt fór út um allt. Kertasníkir æddi inn til að fá sér hálfkaffi (viskí og kaffi).

Hann komst að því að einhver hafði drukkið viskíið og ekkert annað var til. Kaffibollinn fór í gólfið og brotnaði þannig að brotin fóru um allt gólf. Þegar hann ætlaði að sópa sá hann að mýsnar höfðu nagað hárin af kústinum. Þá er bankað á hellisdyrnar, í brjáluðu skapi strunsar sveinki til dyra. Fyrir utan stendur engill með jólatré. "Hvar vilt þú að ég setji tréð?" spyr engillinn.....

Og þannig kom það til, vinir mínir, að engillinn situr á toppi jólatrésins

Gott þið höfðuð ekki miklar áhyggjur af fatavandræðum mínum á föstudaginn. Ég endaði á að fara sæmileg til fara og reddaði rauðadæminu með því að fara með rauða tösku með mér. Seinna um kvöldið var ég svo komin með rautt pakkaskraut á ennið, borða um hendina og einhverja ægilega aðventuskreytingu í hárið. Vann svo fagurgræna prjónavettlinga í pakkaleiknum og arkaði stolt með þetta allt í bæinn og var þar fram til klukkan 5 um morguninn.

Sérdeilis skemmtilegur jólafrokost þar sem ég kom öllum á óvart (mér sjálfri þó mest) og drakk bekkjarbræður mína alla með tölu undir borðið. Ákavíti rúlar. Er mikið stolt af þessu og hef sagt hverjum sem vilja og vilja ekki heyra frá þessum miklu gleðitíðindum.

Þetta var minn fyrsti julefrokost frá því ég flutti hingað og þótti mér ákaflega skemmtilegt að aðaldæmið þarna var lifrakæfa á rúgbrauð! Danir éta þetta daglega, skildi ekki alveg af hverju þeir hafa þetta með í julefrokostinum, en komst að því þegar þetta var borið fram. Lifrakæfunni hafði verið hvolft úr álbakkanum á eldfast fat, sett bacon ofaná, sveppir á kanntinn og inní ofn.
Talandi um að lifa á brúninni!


Endaði aftur í bænum á laugrdaginn og var það öllu sveittara djamm þar sem ég endaði með typpateygjuna hennar Ágústu á hausnum og tók Tjernobyl barnet intenst á dansgólfinu á Hekken.
Skemmtilegt það.

Það fer svo nokkuð fáum orðum um sunnudaginn. Ég svaf. Enda gömul kerling.


Jæja, communication að byrja. Ekki nema 4 tímar af Helle Svendsen. Epli augna minna :)

Samúð óskast

Ohh!

Er að fara í Julefrokost og á ekkert til að fara í. Er glær eftir veikindi síðustu vikna, raninn fullur af hori og ég augljóslega með mikla og króníska ljótu.

Til að toppa allt þá er god damn rautt þema í kvöld. Þegar og ef ég finn eitthvað rautt til að fara í á ég eftir að líta út eins og jólastafur.

Velbekom.

P.S. Ætla að fara á eftir og kaupa mér rugl dýra skó og einhvern sérlega rándýr föt við. Þið fáið engar jólagjafir.

Harmsögur

Ég er búin að vera tussuleg í maaaarga daga. Komið á aðra viku núna, mikið gaman. Búin að reyna allt. Afneita þessu og mæta í skólann. Búin að reyna að taka verkjatöflu og sofa þetta úr mér. Búin að liggja uppí rúmi heila helgi og hvílast vel og búin að reyna að hlaupa þetta úr mér í ræktinni. Amma hefur glumið í hausnum á mér allan tíman sem ég er búin að vera svona, því ég man alltaf eftir því þegar ég var lítil og lasin þá hringdi amma í mann spes til þess að segja að maður eigi að vera í sokkum og ekki láta sér verða kalt, sérstaklega ekki á tásunum. Vera með trefil og slappa af.
Endaði með því þegar ég var næstum því búin að hósta upp lifrinni í þriðja sinn þann klukkutímann að ég hringdi í lækninn. Hún vildi, mér að óvörum endilega fá mig í heimsókn og hlusta mig. Lungun á mér möluðu eins og kettlingur þannig að ég hélt að ég yrði bara send heim með panodil og sagt að sofa. Neinei, ég send í flýti uppá spítala í allskyns rannsóknir og pot.
Byrjaði á því að stripplast um allt þarna á nærbuxunum einum fata til þess að fara í röntken. Er mjög viss um að konan hafi verið lesbísk og að nota sér aðstöðu sína, því ég var að fara í röntken til að finna út hvort að það væri eitthvað að lungunum í mér. Síðast þegar ég vissi þá voru þau staðsett í brjóstkassanum, en ekki rasskinnunum.
Jæja, ég lifði þetta af, enda mjög svo ekki spéhrædd og fannst þetta því lítið mál að vippa mér úr öllu til þess að græja þetta. Fór bara að pæla í þessu eftir á að þetta gæti nú varla átt að vera svona.
Næst var ég send í blóðprufu. ég var búin að reikna út að það tæki svona 10 mínútur tops, og ég myndi ná strætó uppí skóla korteri seinna. Bjartsýni, myndi ég kalla þetta.
Fyrst þurfti maður að taka númer! Bara eins og á pósthúsinu. Jæja, ég tek númer og það eru 10 á undan mér. Það líður nú ekki svo langur tími, þá er ég kölluð upp og beðin um að setjast á stól. Bretti upp peysuna og kellingin strekkir ól utan um hendina til þess að fá æðina fram. Það gekk ekki. Þá prufaði hún að strekkja betur. Það gekk ekki. Þá prufaði hún að stinga og hún hefði fengið meira blóð með því að stinga nál í stein. Jæja, hún gefst ekki upp og reyndi að fá æðina fram á hinum handleggnum. Það gekk ekki svo ólin var strekkt betur. Gekk ekki neitt svo hún náði í aðra ól til að strekkja utanum hendina á mér. Þegar þarna er komið við sögu þá leið mér eins og hendin á mér væri að springa. Loksins stakk konugreyið og það gekk ekki neitt að stinga. Hún stakk og stakk þangað til að ég var orðin eins og gatasigti þarna og ekkert gekk. LOKSINS náði hún að stinga á helvítis æðina og þá var partý! Glasið fylltist á núll einni og hún tók nálina út. Þá sprautaðist blóð yfir allt þarna og konu greyið réði ekki neitt við neitt og þær voru komnar 3 þarna til að reyna að stoppa þessi ósköp. Meðan var ég í hláturskasti og gat ekki hjálpað.
Núna er ég enn marin á hendinni. Ég hef aldrei fengið annað eins mar! Ég er eins og gæjarnir þarna í blueman show, marið er svo stórt.

En ég fékk pensilín og er held ég aðeins byrjuð að skríða saman. Tími kominn til, er ekki að nenna þessum slappleika lengur.

Ég kem heim til Íslands 11 desember. Langar mikið á Frostrósatónleika. Hver vill með? (Langar nú mest í höllina, en kyngi kannski stoltinu og fer í Ólafsvík bara..)

Blogg

Hef ákeðið að láta aðeins vita af mér. Ég er í lagi fyrir utan það að maður er ekki eins og maður á að sér að vera þessa dagana. Kenni skammdegi og kreppu um það, þó að ég sé ekki í slæmum málum þá eru margir aðrir sem ég þekki og þykir vænt um í slæmum málum og það er ekkert sem maður getur gert til að hjálpa.

Ég er alltaf bara í skólanum og gengur ágætlega þar. Fyrir utan klikkaðan skólaleiða, en ég hlýt að koma mér uppúr því hvað á hverju, enda þvílíka verkefnafjallið að hellast á okkur á næstu vikum þannig að það er eins gott að takast á við það af fullum krafti.

Þetta blogg er eitthvað að dala. Íhuga að taka pásu.

Tvær myndir í lokin, Arnór Alex og Auður í Bumbó stólunum sem við Jón Pétur gáfum þeim í skírnargjöf. Svo sæt.

Myndirnar eru frá foreldrum þeirra :)