Búið að vera brjúlet að gera svo að ég hef ekki mikið verið með hugann við blogg síðustu daga. Skóli útí hið óendanlega og ég búin að sökkva mér alveg í hann og loksins komin á eitthvað almennilegt skrið með þetta allt saman. Vona bara að það haldist aðeins áfram.

Við Fróði, Fífí og "Gunnar" unum hag okkar vel hérna í sveitinni. Ég er reyndar ekkert alveg að fíla að vera ein í 300 fermetra húsi einhverstaðar í burtu frá bænum, en hlýt að lifa þetta af.

Fróði greyið hatar að hafa mig bara eina hérna. Hann er vanur að það sé alltaf einhver heima nema rétt á morgnana. Núna er aldrei neinn heima og þegar ég kem heim seint á daginn þá sér maður vonbrigðin í augunum alveg um leið "ohh þetta er bara hún AFTUR!". Greyið litla.


Eyjólfur litli bróðir minn varð 7 ára á föstudaginn. Hann er í Ameríkunni að spóka sig og hélt víst bara pool partý og var með græna AMERÍSKA afmælisköku. Þær kökur eru viðbjóður. En ekki þegar maður er 7 ára gæji.

Annars finnst mér alveg bara vika síðan hann var alveg pínkupons lítið spons. En í dag er hann bara orðinn einhver töffari.

Svo á föstudaginn átti Ásdís systir hans Jóns Péturs pííínulitla og ofboðslega sæta stelpu. Alveg eins og ég var búin að halda fram allan tíman (sko að þetta væri stelpa).
Sendi hamingjuóskir í fjörðinn, svona ef ske kynni að tengdafjölskyldan skyldi villast hingað inn :)

Fróði vill fara út, svo það er best að sinna honum..

Blogg nr 700!

Jæja, allir farnir og bara ég, Fróði, Fífí, og gullfiskurinn hennar Vilborgar sem ég hef ekki hugmynd um hvað heitir. Held ég kalli hann bara Gunnar.
Við bara alein í sveitinni hennar mömmu. Og ég með hræðilett. Og heimavinnu dauðans. Samt er ég bara í 3 fögum. Skil þetta ekki.
Samt fínt að hafa nóg að gera.

Plehh, jæja best að fara út að ganga með Fróða. Verður ágætt að fá sér smá frískt loft.

Afmælis

Pabbi gamli á afmæli í dag og langar mig að óska honum til hamingju með það. Jafnframt við ég benda honum á að njóta síðasta ársins sem hann á sem þrjátíu og eitthvað.
Þetta setur reyndar gífurlega pressu á mig. Verð að vera komin með barn fyrir 7. apríl á næsta ári, ef ég ætla að þóknast föður mínum, sem vill ólmur verða afi fyrir fertugt.



Einar Páll á líka afmæli í dag. Og fær hamingjuóskir frá mér. Hjalli (my brother from another mother) á líka afmæli í dag. Óska honum líka til hamingju með áfangann.

Allir á leið í karabíska á morgun. Er að kafna úr öfund og langar mest að grenja. Vil komast í sól og hita. Fínt veður hér reyndar, en ekki nógu heitt til að stripplast um berleggjaður í flippflopps. En ég verð hérna bitur í gluggaveðrinu að læra stærðfræði eins og enginn sé morgundagurinn.

Sem betur fer stendur svolítið skemmtilegt á dagatalinu mínu í lok apríl. Bara rúmar tvær vikur..!

Well

Held að bráðum verði bloggverndarnefnd sigað á mig fyrir vanrækslu á annars ágætu bloggi.

Það er reyndar ekkert að frétta svosem. Helgin var svaka fín. Sérstaklega föstudagskvöldið. Of mikið hlegið. Maskari niðrá kinnar og kviðslit. Var dama í gær. Í kjól og hælaskóm. Augnskuggi og gloss. Og Gucci. Gleymdi að taka mynd. Í dag var það joggingbuxur og hettupeysa vegna lærdóms. Verður eitthvað svipað á morgun líka.

Alveg að fá magasár útaf vinnu og búsetumálum í sumar. Kem heim í 6-8 vikur og vantar vinnu heima. Helst á Snæfellsnesi. Eða bara í Grundarfirði.
Annars á Seltjarnarnesi og nágrenni.
Ef einhver sniðugur þarna úti vill ráða mig í vinnu þennan tíma þá myndi það lækna geðheilsuna alveg um heilan helling...

Baddý og Haddý

Handywomen!

Í janúar brotnaði síminn minn aðeins. Ég var nýbúin að senda sms liggjandi uppí rúmi. Svo ætlaði ég að opna gluggan og fór með hnéið á símann, hann lá í rúminu og rúmdýnan náttúrulega gaf undan og hann brotnaði. Svona..

Jón Pétur var svo indæll að lána mér staðgengil, því ég fann/finn engan flottan síma sem mig langar í.

Svo í mars fékk Villi þessa snilldarhugmynd að líma bara símann með svona superglue. Sem ég og gerði. Fór sérferð í Harald Nyborg og valdi mér extra sterkt superglue til að það væri hægt að laga símagreyið. Síðan skundaði ég heim og púslaði símanum saman og límdi eins og enginn væri morgundagurinn. Lét símann svo liggja undir blómavasa yfir nótt. Daginn eftir var hann eins og nýr..

Ég var yfir mig ánægð með að hafa sjálf lagað síman. En það entist ekki lengi. Ég lennti á Íslandi og gat ekki opnað símann til að taka kortið úr. Hafði þá límt hann það vel saman að danska kortið mitt var fast inní honum. Okay, fór aftur í að nota símann hans Jóns Péturs og ekkert mál. (Tók hann með til Íslands því ég ætlaði að skila honum til eigandans)

Síðan í gær þá byrjaði síminn minn að vera með einhverja sambands stæla. Sem sagt, var ekkert samband á honum. Ég náttúrulega hélt að hann væri orðinn alveg ónýtur núna og eftir nokkra klukkutíma gafst ég upp á að laga hann. Þá mundi ég að ég hefði límt kortið mitt inní honum. Svo þetta er afrakstur gærkvöldsins.

Ég er því aftur farin að nota síman hans Jóns Péturs með tilheyrandi samviskubiti. Held ég verði að fara útí búð og versla síma.. :)

Lífsreynslusagan

Ég hef ákveðið að taka upp nýjan lið hérna á froggie.com. Svona í ljósi þess að ég er orðin tvítug. Tvítug brussa. Ég hef því ákveðið að miðla reyslu minni til annara brussna. Þar sem ég hef nú einu sinni verið brussa í tuttugu ár og brussið virðist ekki ætla að vaxa af mér, þó að mér takist einstaka sinnum að feika'ða með að þykjast vera kvennleg. Þá verður fólk svo sjokkerað að ég skuli vera glossuð og með sléttað hár að það virðist ekki taka eftir því að ég brýt hælinn á skónum eða festi tyggjó í hárinu.

Síðasta miðvikudag átti ég mitt brussmóment. Ágætt að það kom þegar ég var komin til Danmerkur en ekki þegar ég var í kökuboði í Grundarfirði.
Semsagt, ef ég væri þið þá myndi ég ekki reyna að beygja mig eftir húslyklunum þegar að þið eruð með tveggja vikna byrgðir af fötum og skóm í bakpokanum og lífsbirgðir af kókópöffsi og ostum, því þá gerist þetta..

Held ég fari að mæta í ræktina.

Sjiii hvað þetta er fyndið!

I KILL YOU!!!

Lægð

Það hefur verið lægð yfir landinu. Eða aðalega mér. Margt að hugsa, stórir bitar að kyngja og sætta sig við og ég að berjast við að koma lífinu í fastar skorður eftir að hafa látið dekra við rassgatið á mér í tvær vikur.
En hugsa ég sé nú að koma til. Það er komið svo ógeðslega gott veður hérna úti. Orðið hlýtt og notalegt. Hægt að fara út án þess að fá kalsár á tærnar. Það rignir reyndar núna, en það er önnur saga.
Ég er að reyna að sætta mig við það að kærastinn sé bara að spóka sig með fótboltanum hérna (reyndar í æfingabúðum) og að öll fjölskyldan mín eins og hún leggur sig (mömmumegin) verði hér að dunda sér í karabíska eftir rúma viku.
Ég ætla bara í mína eigin útlanda/ævintýraferð í haustfríinu mínu. Hvort sem ég þarf að fara ein eða ekki :)

Vantar vinnu. Eða bara peninga. Eða flugmiða til Íslands bara..

Erfitt líf :)

Æji ég er svo mikil barnagæla. Sjáiði bara hvað Aníta Ósk alveg malar eins og köttur í fanginu á mér.

Well, ætli maður myndi ekki brjótast um og og vera með læti ef að það kæmi allt í einu einhver ókunnug kjélling og rifi mann í fangið.

Annars er ég bara að græja mig fyrir flug. Pakka niður öllum ostunum og kókópöffsinu sem ég keypti í bónus til að taka með mér út. Þarf svo að klára eitthvað svona smásnatt í bænum í fyrramálið og svo bara bruna útá völl. Verð komin inn um dyrnar hjá mér klukkan 1 næstu nótt. En sem betur fer ætlar Villi að vera samferða mér til Horsens og ég keypti Fuglastríðið í Lumbruskógi til að horfa á í lestinni. Víjjj!

Ég er annars með blöðrubólgu fyrir allan peninginn. Get ekki setið. Verður gaman á morgun!

Einhver töfraráð til að koma blöðrubólgu fyrir kattarnef?

Stikklað á stóru

Er ekki í bloggstuði, enda að vinna upp tveggja vikna tölvuleysi. Búin að missa af helling í internetinu á þeim tíma, en damn hvað ég er afslöppuð.
Set inn punkta og myndir. Reyndar er ég búin að vera alltof ódugleg við að taka myndir uppá síðkastið. Sem er til skammar!!

Elska Ísland. Búin að..

• Eiga afmæli
• Kaupa áfengi
• Fara á Sálina
• Vera með famelíunni
• Halda uppá afmæli
• Hitta skemmtilegu vinkonur mínar
• Knúsast í kærastanum mínum
• Borða yfir mig nokkrum sinnum
• Kynnast ótrúlega skemmtilegu fólki
• Gera allskonar ótrúlega skemmtilegt
• Gera ekki neitt
• Vera í Grundarfirði
• ...fíla það í ræmur
• Koma til Stykkishólms
• Fara í sund
• Fara í sumarbústaði
• Skíttapa í Mini-golfi
• Horfa á fótboltaleik (alveg fyrsta korterið)
• Hafa það allt allt allt of gott!

Takk fyrir mig allir :)

Við Eva í góðu geimi!


Líka BJARNA

Afmæliskakan

Við Gamli

Aníta og Andrea sætu sætu



Að tapa í Minigolfi og vera alveg sama yfir því!!!

Páskaskraut(ið) verðlaun fyrir þann sem sér það!

Burðardýr

Ég ætlaði aldeilis að pakka létt fyrir þessa blessuðu Íslandsferð mína. En svo mundi ég eftir að ég er með hálfa búslóð fyrir vin minn. Hann sagðist nú hafa fengið gám þegar hann flutti frá DK fyrir mánuði síðan og að þetta væri bara svona restar. En svona þegar ég hugsa útí það þá sá ég aldrei þennan gám.
Uss, læt ekki plata mig svona aftur!
Ekki það, ef að ég hefði ekki verið með þessa hluti fyrir vin minn þá hefði ég nú bara pakkað einhverjum óþarfa í staðin fyrir bomsurnar og blómahanskana :)

Kræst

Almáttugur á himnum!
Ég tók einhverja voða svefntöflu fyrir tveim tímum og er búin að liggja andvaka síðan. Bara alveg í hörku stuði. Svo ég gafst upp. Veit ekki alveg hvernig ég á að tækla þessi svefnvandamál mín. Komst í lag í nokkra daga en núna virðist sama sagan ætla að endurtaka sig. Veit ekki hvort ég eigi að reyna að halda mér vakandi í sólarhring eða hvað. Kann ekki á þetta. Þetta er allavega ekki fyndið lengur. Ég ætlaði ekki að þurfa að díla við svefnleysi fyrr en ég eignast börn.

En nóg um það.
Það verður tekið maraþon í fólkshitting um helgina. Seisei já. Helgin er pökkuð með plönum um að hitta uppáhalds fólkið mitt. Vííj hvað verður gaman. Svo verða bara rólegheit og "sill" þangað til ég fer heim þann 26. mars.

Fór til Vejle á laugardagskvöldið. Datt nú ekki alveg í það eins og stóð til en Svanhildur reyndi samt sitt besta. Gaf mér þennan líka yndislega "kokteil". Frosin jarðaber og Bacardi. Skulum bara orða það þannig að næst ætla ég ekki að fá mér "kokteil" hjá sveitastelpu, heldur flóaða mjólk og kleinur :)
En það var nú svosem bara útaf því að klukkan var orðin svo margt og allt hráefni búið þegar við loksins létum sjá okkur í Vejle. Það sást líka vel á fólkinu sem var fyrir í partýinu.
Annars var stuð í Vejle bara. Fórum svo á Krokowski. Þar þarf maður að vera 24 ára til að komast inn. Við notuðum bara gamla góða, sendum Einar inn fyrst, því hann var með skilríki, settum brjóstin uppí höku og töluðum bara ensku. Redda sér. Þegar inn var komið fórum við svo og stigum trylltan dans á dansgólfinu með fertugum verðbréfamiðlurum og 18 ára kærustum þeirra sem voru úti að leika með nýju sílíkon brjóstin sín. Voða sætt.
Kannski ágætt að segja frá því líka að síðast þegar ég fór á þennan stað þá sá ég tvífara hans Þolla þarna á dansgólfinu í vægast sagt villtum og trylltum dansi. Það var fyndið.

Ágústa og ég andsetin!

Well, best að athuga hvort ég geti ekki sofnað smá áður en ég fer í skólann.


P.S. Þið þarna "gömlu" Hrossanesbúar?! Þurfum að plana föstudaginn..!

Stjáni

á afmæli í dag.

Ég vildi nú bara óska honum til hamingju með að eiga bara eitt ár eftir í fertugsaldurinn.

Afmælisbarnið verður að heiman í dag. Hann ætlar að vera viðstaddur lessubrúðkaup í Kaupmannahöfn!

Við Stjáni á Þorrablóti IFH!

Vika

Ekki neitt!

Draslið heima hjá mér hefur náð nýjum víddum. Það er útum allt! Reyndar eru þetta einungis föt og skólabækur sem liggur hér á víð og dreif, en það er sama. Verð að koma einhverju skipulagi á þetta, helst ekki seinna en í gær.

Mig vantar líka einhvern sem er sjúklega klár að innrétta. Veit ekkert hvernig ég á að hafa hérna heima hjá mér. Ætli það sé samt ekki sama hvernig maður hefur þetta, það verður alltaf þannig að maður leggur frá sér einn hlut og þá er komið drasl.

Var annars að koma heim. Unglingaklúbburinn minn hittist á Onsdagsbarnum áðan og ég bustaði þau öll í singstar. Dúettinn okkar Vilborgar sló samt öll met. "I WANNA KNOW WHAT LOVE IS!!"

Jæja, svefnleysið loksins farið að segja almennilega til sín. Ég er svo þreytt að ég gæti sprungið. Hugsa að ég taki smá til og fari svo í bælið.

Ehh, já eitt enn. Var að taka til í linkunum mínum og bætti við nokkrum. Ef einhver vill ekki vera með link á síðuna sína þarna eða telur sig eiga skilið að fá link, sendið þá póst á kristinalma@hotmail.com

:)

Fyrirgefðu

Í færslunni hér að neðan tala ég um að ég sé að fara í ökumat í Grundarfirði. Svo segi ég að það yrði helvíti vandræðalegt að falla á þessu svona lengst útí sveit.
Vil biðjast afsökunar á þessu. Grundarfjörður er nafli alheimsins. Ekki Reykjavík eins og ég hef haldið fram statt og stöðugt frá því ég gat talað. Heldur Grundarfjörður.
Máli mínu til stuðnings vil ég benda á að Bangsi Bestaskinn leitaði að Grundó þegar sá ágæti þáttur var og hét...

Smellið HÉR til að sjá allt Intróið.

9 dagar

Það eru 9 dagar í að ég komist heim til Íslands. Er of snemmt að byrja að pakka núna?

Við vorum að fatta að við verðum í loftinu þegar ég á afmæli. Lendum held ég klukkan 00.30 þann 14. mars. Þannig að ég get stokkið beint út og keypt tollinn!
Er á fullu að reyna að plana þessa Íslandsferð. Þarf nefninlega nauðsynlega að fara í Grundarfjörð. Í ökumat. Og bara mat. Er svo stressuð fyrir því, vandræðalegt að falla á ökumati lengst útí sveit!!

Ég er að reyna að ákveða mig hvort að ég eigi að vera að hafa kökuboð fyrir famelíuna. Það er nú bara hægara sagt en gert með þessa huges famelíu mína :) En langar svo að hitta alla, þannig að það verður nú líklegast samt eitthvað smá kökukaffi. Bara á eftir að finna stað til að hafa það á. Kemur í ljós. Væri náttúrulega sniðugast að við Salka myndum bara halda uppá 25 ára afmælið okkar. Þar sem litla sponsið mitt verður 5 ára 25. mars. Hræðilegt hvað þessi börn stækka.

---

Fékk snemmbúna afmælisgjöf á sunnudaginn. Abba showið frá London var hérna í Horsens í einhverja 10 daga og Villi var svo sætur að bjóða mér á það. Svo ég þyrfti nú ekki að fara til London(s) í leikhús. Var ekkert smá flott, maður var með tár í augunum og gæsahúð til skiptis.
Svo kíktum við á Svanhildi í Vejle. Fórum á Konrads og kjöftuðum þar fram að lokun. Voða gaman hjá okkur. Er búin að fatta það núna að það er ekkert langt að fara til Vejle í heimsókn.

Well, best að fara að horfa á Juno. Unglingaklúbburinn minn hérna í Horsens er með Video-kósý kvöld á miðvikudaginn og ég þarf að athuga hvort þessi mynd sé nokkuð ógeðsleg. Ætla ekki að fá símhringingar frá brjáluðum mosamömmum á fimmtudaginn :)

Tvífarar

Held ég fari bara að splæsa í klippingu. Vantar krullur líka, hvar kaupir maður svoleiðis?

Enn meira svefnleysi

Já, get nú aldeils sagt að ég hafi tekið framförum í dag. Náði að festa svefn að verða 7 í morgun og svaf til 10:45 í einum rykk. Ekki slæmt það. Fannst ég líka úthvíld þegar ég vaknaði.

Maður verður dáldið geðveikur á svona svefnleysi og held ég að það sé kominn tími til að láta athuga þetta eitthvað, svo það verður farin læknisferð í vikunni, ef ég fer ekki að ná að sofa, enda ekki alveg eðlilegt að tvítug og hraust stelpa hætti að sofa allt í einu! Kannski er þetta ellimerki..?

Verð allavega að vera búin að sofa eitthvað áður en ég kem til Íslands, því annars eru mikil hætta á að ég sofi bara útí eitt í sveitinni, svo rólegt þar.

Já, það er kannski rétt að benda dyggum lesendum frosksins á að jólarósin dó drottni sínum í vikunni. Enda ef eigandinn er eins og liðið lík, þá verður blómið það líka.
Hélt lífinu í blessuðu blóminu í rúma 3 mánuði! Núna get ég fengið mér gæludýr og prufað að halda lífinu í því, ef það gengur upp og ég skola ekki gullfiskabúrið með sápu þá er mér óhætt að fara að hrúga niður börnum. Það er víst reglan.
Svo vill pabbi líka verða afi fyrir fertugt þannig að það er eins gott að fara að haska sér!!!
Djóóók :)

Jæja, best að pilla sér, er að fara í matarboð til Stjána. Hann býr í Köben og þetta var ákveðið fyrir korteri að við myndum fara. Elska skyndiákvarðanir :)

Það hefur verið staðfest!

Þegar ég var búin til, var greinilega ekki verið að vanda sig. Það liggur í augum uppi að það hafi verið spreðað óþarflega mikið af karla-genum í mig.
Allavega svona ef þið horfið á þetta myndband (ekki myndband af þeirri athöfn samt).

Ég verð svona þegar ég er veik. Eins og núna. Ég á svooooo bágt að mig langar bara að fara heim til mömmu og liggja í mömmuholu þangað til mér batnar.

Er samt bara með smá hita, beinverki og hálsbólgu. Ekkert alvarlegt..

Konur eru konum verstar :)

Jáhá.
Það er stelpa hérna í kantínunni í skólanum þar sem ég sit núna og er hágrátandi að tala við einhvern (örugglega kærastann, sem býr í öðru landi langt í burtu) á skype og er með hann í webcam.
Þau tala skrítna útlensku sem ég skil ekki.
En allt í einu þá leit hún svona flóttalega í kringum sig og fór svo að skellihlægja. Snéri svo tölvunni að mér þannig að ég sæist í webcaminu. Leiðinleg maður. Ég veit ég er eins og draugur, með bauga niður á nafla og orðin veik í þokkabót með hausverk, beinverki og hitavellu. En það á að vorkenna manni í svoleiðis ástandi, ekki hlægja eins og norn og sýna einhverjum gaur í Rússlandi hvað ég er tussuleg!
Kannski er ég bara svona ljót in general. Hvað veit maður!

Þá hætti ég allavega að vorkenna henni að vera svona í burtu frá kærastanum sínum og eitthvað. Langar að hrækja á hana.

En best að halda áfram að vinna. Þetta hjélvíti græjar sig ekki sjálft :)

16 dagar

Jeminn.
Það eru alveg takmörk fyrir hvað maður nennir að hlusta á eitthvað röfl um Sókrates eftir þriggja tíma svefn. Sérstaklega þegar maður svaf í 2 tíma nóttina á undan.
Virðist þjást af einhverjum svefnörðuleikum þessa dagana sem lýsa sér þannig að ég ligg andvaka hálfa nóttina, svo loksins þegar ég festi svefn þá hrekk ég upp aftur eftir smá stund og þá verð ég aftur andvaka, sofna svo loksins og vakna aftur eftir smá stund. Svona genga næturnar á Kollegievænget fyrir sig þessa dagana. Gífurleg stemmning!!
Vona að þetta fari að ganga yfir.
Annars verður að fara að gera einhverjar róttækar ráðstafanir. Því ekki hef ég tíma til að leggja mig á daginn.

16 dagar í að ég, Villi og Stjáni fljúgum til Íslands og ég held að ég sé bara hreinlega að deyja úr spenning. Langt síðan ég hef hlakkað svona mikið til einhvers. Er alveg eins og lítið barn að bíða eftir jólunum.
Verður alveg frábært að komast aðeins heim og hitta alla :)

*Á myndinni er Baldur Freyr Almarsson

Konudagur

Arna mín, til hamingju með daginn :)

Bara ein blaðamannaverðlaun!

Jæja, maður hefur kannski smá rétt á að vera montinn núna. Pabbi og Þóra voru að fá blaðamannaverðlaun. Alveg vissi ég að þau myndu "hneppa hrossið", þó að pabbi hafi verið hógværðin uppmáluð og sagt að þau myndu ekkert fá þessi verðlaun. Deildu þessum verðlaunum reyndar með DV, en hverjum er ekki sama.

Siimar og Fóra áttu þetta allavega skilið.




Svo vona ég innilega að þessi verðlaun hafi verið í formi styttu, eða bikar. Svo að þessi ljóta Edda geti farið niðrí geymslu :)

Aldrei kaus ég Framsókn!?

Mikið ofboðslega finnst mér íslensk pólitík eitthvað sandkassaleiksleg þessa dagana.

Er ekki lýðræði á Íslandi lengur?
Er Össur Skarphéðinsson ekki farinn sooooldið langt yfir strikið?

Í næstu kosningum ætla ég bara að kjósa Framsókn. Því Guðni Ágústson sagði að ég væri falleg stúlka þegar hann kom og var veislustjóri á þorrablótinu okkar síðustu helgi.

Svona leit ég út þegar ég hitti Guðna. Veit ekki hvað greyið maðurinn hefur haldið :)

Love will keep you warm..

Mikið ofboðslega leiðist mér útlenska sem ég skil ekki.
Sko, ég sit nefninlega uppí skóla og það eru einhverjir frakkar (eða jakkar) að tala við aðra frakka á skype eða eitthvað. Sitja tveir í sitthvorri tölvunni og blaðra eins og enginn sé morgundagurinn. Fáið ykkur headset fólk!
Síðan eru öðruvísi útlendingar að éta einhverjar gamlar matarleyfar úr kantínunni. Ojbarasta! Frekar myndi ég borða ælu sem hefði kúkað á súrt hey heldur en að borða gamlan mat úr þessari kantínu, eiginlega heldur ekki nýjan, ef útí það er farið - Ógeðs fólk og ógeðs kantína.
Gleðileg færsla maður.
Er í tilvistarkreppu dauðans.

------

Mamma elti Jón Pétur til Íslands í gær. Kom við hjá Stjána í leiðinni. Ótrúlegt með mömmu, hún á 5 börn en verður samt að vera mamma allra. Því 5 börn og hundur er jú ekki nóg :)
Meðan hún er á Íslandi þá ætla ég að stjórnast á litlu greyjunum. Held þeim finnist það ágætt. Mér finnst það allvega fínt, þá hefur maður allavega nóg fyrir stafni.

-----

Kræst hvað Pernille Rosendal er ógeðslega töff gella.

Varð bara að koma því að, því ég er í einhverju "nostalgíu" kasti að hlusta á Swan Lee..

Jemundur minn!

Ég er koffín fíkill.
Ætlaði að reyna að komast í gegnum daginn án þess að fá mér coke eða kaffi. Dó næstum.
Endaði með því klukkan 18:00 að ég fékk mér coke og var það einungis til þess að ég myndi ekki ráðast á systkini mín. 18:03 var ég orðin ljúf sem lamb.
Síðan drakk ég smá meira coke þegar ég fór að passa bróðurson minn, hann Gunnar rúsínukrúttrass. Svo tapaði ég mér alveg í gleðinni þegar að ég fór hingað uppí skóla um 10 leytið. Kaaaaafffffffiiiiiii!!!!!! :)

Taka tvö á morgun..

Ha já!

Jón Pétur farinn heim að sparka í tuðru fyrir vestan og pínu tómlegt hérna hjá okkur í Hrossanesi. Allavega búið að vera það í dag, en við verðum fljót að gleyma. Allir nema mamma, því hún virðist ekki ætla að sætta sig við að það séu allir að flytja frá henni þannig að hún ætlar að drífa sig til Íslands á fimmtudaginn til þess að kíkja á liðið og athuga hvort það sé ekki í lagi með alla.

Ég sjálf virðist ekki vera með jafn mikinn aðskilnaðarkvíða þannig að ég á ekki pantað far heim fyrr en eftir rúmar 3 vikur, eða 13 mars. Lendi eftir miðnætti þannig að næst þegar þið sjáið mig verð ég búin að vera tvítug í nokkra klukkutíma.

Mikil tilhlökkun, því kvöldið 14. mars (afmælisdaginn minn) ætla Sálin hans Jóns míns að halda uppá 20 ára afmælið sitt líka, svo í staðinn fyrir að halda brjálað partý þá ætla ég að skella mér bara í höllina ásamt fríðu föruneyti og gera allt vitlaust. Meeen hvað verður ruddalega gaman!!

Annars er allt í fínu formi bara. Skólinn alveg á skrilljón og það er sko engin afslöppun. Þorrablótið búið og var alveg ógeðslega skemmtilegt. Svo núna er fundarfrí í stjórninni í held ég alveg rúmlega viku.

Sumarið kíkti við í síðustu viku. Allt að verða grænt bara :)

Jæja, best að hætta þessu rugli, og koma sér af stað í smá vinnu :)

Fyrir þann gamla og Valdísi

Uppskriftin er svona, alveg megahega einföld..

Ca 4 kjúklingabringur
Ostasósa
Salsasósa
Rifinn ostur
1 poki Doritos snakk

Aðferð:

Kjúklingabringurnar eru skornar í bita, steiktar á pönnu og kryddaðar vel eftir smekk (finnst best að nota fahitas kryddblöndu).
Doritos snakk er mulið og sett í botn á eldföstu móti. Ostasósan þar ofaná og síðan salsasósan. Síðan eru steiktar kjúklingabringurnar settar þar ofaná og síðan rifinn ostur. Sett inn í ofn í 15-20 mín 200°

Mér finnst líka fínt að hafa bara hreinan smurost í staðinn fyrir ostasósuna. Ég gerði það þegar þið voruð í mat. Þá blanda ég bara saman salsasósu og smurosti og dembi yfir snakkið.

Tilvalið

Finnst tilvalið að birta mynd af jólarósinni sem er tveggja og hálfs mánaða í dag. Ég er sem sagt buin að setja nýtt met í uppihaldi blóma í fjölskyldunni. Fyrir utan ömmu.

Hún er alveg í þrusu stuði og hress sem fress (blómið sko) Fær vatn að drekka öðru hvoru og síðan finnst virðist hún líta best út þegar hún fær afgangs coke, eða annað gos. Skil þetta ekki alveg.

Hér er ein artý ljósmynd sem ég tók af henni um daginn. Held ég þurfi að fara að þurrka af kvikindinu..

up-date

Ætli það sé ekki kominn tími á smá blogg.
Ég held áfram að græða á Íslendingunum sem eru að flytja í burtu. Svo virðist sem þeir keppist um að reyna að toppa hvern annan, sem ég skil svona ekki alveg, en það er nú víst ég sem er að græða þannig að maður kvartar ekki.

Stjáni:

• Copy kort sem maður getur notað í skólanum, kom sér einstaklega vel!
• Jagermaster svitaband á hendina

Bjarni og Arna:

• Vatnskanna
• Straujárn
• Þráðlaus sími

Garðar og Íris

• Örbylgjuofn

Jón Pétur

• Lager af bollasúpum (Enda greyið líklega kominn með ógeð eftir sumarbústaðarferðina þar sem hann svolgraði í sig svona 30 lítrum af þessu)
• Fótboltasokkar og stuttbuxur
• Stóll
• Heimabíó
• Sjónvarp

Víjj, hvað ég hlakka til þegar að næsta fólk flytur :)

Annars er allt frábært að frétta.
Það er reyndar alveg nóg að gera, sem er alveg fínt. Brjálað að gera í verkefninu fyrir Frikka og ég held barasta að þetta sé besti landafræði kennsla sem ég hef fengið í lífinu. En jafnframt sú strembnasta, því þetta er svoldið mikil handavinna, en samt bara gaman svona þegar að er farið að síga á seinni hlutann.

Skólinn byrjaði á milljón og tíu á mánudaginn, og þetta er alveg svaka keyrsla, svona þegar að það er ekki verið að breyta stundartöflunni og eitthvað vesen. En ég er reyndar svo heppin að ég er ekki í Eðlisfræði og Efnafræði þannig að ég mæti klukkan 10 nánast alla daga og er búin fyrr tvisvar eða þrisvar í viku. Annars líst mér bara mjög vel á þetta allt. Erum 8 Íslendingar í bekknum, allir nýfluttir nema ég, þannig að við reynum svona að hjálpast að með námið, sem er fínt.
Sem sagt allt komið á blússandi sving, eins og pabbi orðaði svo skemmtilega.

Svo er ég komin með herbergisfélaga. Jón Pétur flutti inn á mánudaginn og ætlar að vera fram á þriðjudag, þá flytur hann til Íslands. Voðalega notalegt að búa svona tveir einstaklingar í öllu þessu plássi :) Ég, hann og Jólarósin sem er enn á lífi unum okkur nú samt bara vel þarna saman.

Þorrablót á laugardaginn og mikið stúss sem fylgir því, ég ásamt öðrum kjéllingum úr stjórninni erum að fara að baka rúgbrauð ofaní 200 mans á morgun. Hressandi!!

Jæja, held að allir séu löngu hættir að lesa núna, svo best að slútta þessu.

Fyrir Þóru..!

Var að taka til í tölvunni og fann fullt af baby-myndum af Kötlu. Algjört feitabollurassgat sko!

Fyrir ári..

Vá hvað margt getur breyst á einu ári. Hérna erum við Íris á leiðinni á djammið í lok janúar 2007.
Ýmislegt gerst síðan þarna..!
Íris er til dæmis komin með mann, hús, station og hjólbörur.
Ég.. tjah, fékk mér skjaldböku og skilaði henni aftur.

...

Jájá, tölvan mín er komin á gelgjuna. Gerir ekkert sem hún er beðin um. Þess vegna er eitthvað lítið um blogg..

Verið stillt.

Ég poppa til að gleyma

Játs, ég er svo að græða feitast á þessum fræðingum mínum. Núna eru þeir allir að losa sig við dót og gömul heimilistæki svo ég er fengin til að hirða allt. Enda vantar mig ennþá allskonar svona bú-hluti, þó ég sé búin að búa ein í næstum ár.
Núna eru fræðingarnir ýmist að flytja heim eða þá bara að update-a búslóðina. Þá kemur sér vel að geta bara hringt í mig og látið mig fá dótið. Nýtist mér og þau sleppa við að fara ferð á haugana.
Það sem ég er búin að græða síðan fyrir viku síðan er

• Straujárn (Svo nú fer ég að sofa alltaf í straujuðum rúmfötum eins og í Grundó)
• Vatnskönnu (Því ég ætla að drekka meira vatn og minna coke)
• Þráðlausan síma (Því það er nauðsynlegt að geta talað í síman á klóinu)
• Örbylgjuofn (Ég poppa til að gleyma)

Nú vantar mig bara sófa..

Bleikir þríhyrningar

Jájá, eins og janúar sé nú ekki nógu leiðinlegur mánuður að maður fari ekki að vera veikur ofaní allt annað þunglyndi. Ég er að drukkna í mínu eigin hori. Sem er ekki töff. Rautt nef, fljótandi augu, hausverkur og beinverkir. Svaka hot að vera með hor í öllum skúmaskotum í hausnum og geta ekki andað nema með herkjum og þá gegnum munninn.
En þetta hlýtur nú að ganga yfir.

Sem betur fer styttist í Florida og "krúsið" um Karabískahafið :) Ekki nema 5 mánuðir mínus 2 dagar :)

Vá, útskriftin búin. Í júlí 2004 virtist þessi dagur vera eitthvað svo ofboðslega langt í burtu. Almáttugur minn, hvað ég vissi ekki hvernig ég átti að haga mér þarna í útskriftinni áðan. Hvort ég ætti að grenja eða hlæja eða hvað. Svo ég og mamma sendum þeim öllum bara "Rock on" þegar þeir tóku á móti skírteininu. Fékk svo óneitanlega kjánahroll niðrí rassgat þegar að nafn eins tiltekins Byggingarfræðings var kallað upp og hann bara að dúlla sér í IKEA. Vandræðalegt.

En ætla nú bara að segja til hamingju allir og skemmtið ykkur í partý-inu í kvöld.

-Sjálf ætla ég að passa drekann. Hendast með hann á McDonalds og svo ætlum við að horfa á video og fá okkur popp.

Jæja gott fólk!

Allir voru byggingarfræðingar nema Stjáni, hann var bjáni!

Mér finnst ég ekkert lítið fyndin að hafa samið þennan brandara alveg sjálf. Verst að Stjána greyinu finnst ég ekki jafn fyndin, því hann á eina önn eftir af byggingarfræðinni.
Köggli kláraði í dag og erum við því komin með fjóra byggingarfræðinga í litlu stórfjölskylduna, ekki amalegt það. Fyrir eigum við svona einn lögfræðing, eða lögfræðínu (KVK). Vantar ekki fræðingana!
Svo á næstu árum bætist svo við hópinn annar Byggingarfræðingur, Viðskiptafræðingur, Uppeldisfræðingur, Framleiðslutæknifræðingur og Markaðsfræðingur.
Gaman að þessu.
Nú er það bara útskriftin hjá pjökkunum og svo er það bara að fylla alla gáma af flatskjáum, sófasettum og Rosendahl matarstellum svo fræðingarnir geti flutt til Íslands og byrjað að borga námslánin :)

Fyndnast í heimi

Guð minn góður hvað ég fékk næstum nýrnasteina af hlátri þegar að ég sá þetta.

Hvernig er hægt að finna uppá svona ógeðslega-tussu-mellu-fyndnu? Fröken Feministi. Maður verður að vera gjörsamlega sneiddur öllum húmor til að finnast þetta ekki fyndið.

Jamm og jú

Æji hvað ég er eitthvað glær. Hið árlega skammdegisþunglyndi virkilega farið að segja til sín. Er alltaf glær af þreytu og þyrfti að sofa svona 20 tíma á sólarhring ef vel ætti að vera. En er samt svona að hugsa um að reyna að koma svefninum mínum í nokkuð rétt form svona á næstu dögum og sjá hvort að þessi síþreyta lagist ekki. Svo gengur víst ekki að sofna klukkan 4 og 5 á nóttunni þegar að skólainn byrjar í febrúar.
Held að mér sé farið að hlakka til að byrja í þessum nýja skóla. En get samt ekki gert upp við mig hvort að mér eigi að hlakka til eða kvíða fyrir eða hvað. Kannski útaf því að það er enn smá óvissa með framhaldið. Líka í sambandi við Lín. Ef Lín-konan sem ég meilaði á fyrir viku síðan les þetta þá er hún vinsamlegast beðin um að svara mér!!!
Annars þá fann ég þessa líka fínu stjörnuspá á netinu og þetta lýsir mér bara alveg nokkuð vel. Allavega í augnablikinu. Þetta er nú samt eitthvað voða mikið djók. En samt soldið fyndið.

Fiskur (19. febrúar - 20. mars): Þú ert rugluð og týnd sál og hefur ekki hugmynd um hvernig þú átt að nýta hæfileika þína eða í hvaða átt þú átt að fara. Þú vilt vera alls staðar og upplifa allt. En þar sem þetta er ómögulegt, þá fer allt í vitleysu. En það gerir ekkert til, þú ert sérfræðingur í sjálfsblekkingum og því að flýja raunveruleikann.

Gaman að þessu!

Best að ég fari bara að sofa í hausinn á mér, þetta er alveg drullu leiðinleg færsla!!!

Nýtt ár, nýjar áherslur..

Svona til að vera ekki svona döll alltaf þá er ég að hugsa um að gera doldið flippað í ár. Er að hugsa um að halda með Manchester United núna. Hvað segir fólkið um það?
Ég nefninlega á Manchester treyjuna og finnst algjör synd að geta ekki notað hana, sem ég get augljóslega ekki ef ég held með Arsenal.
Eina sem ég hef áhyggjur af er það að pabbi afneiti mér. Og mamma líka. Má ekki við því, er að verða tvítug eftir akkúrat tvo mánuði og á von á stórum gjöfum. Verður ekki mikið um stórar gjafir ef að ég svíkist um fótboltalið.
En á móti kemur að móðurbræður mínir, föðurbróðir og strákarnir hérna úti halda með Manchester, svo það gæti kannski stækkað gjafirnar frá þeim að ég skuli halda með þeirra liði. Svo er annað í þessu. Ég á ekki og hef aldrei átt Arsenal treyju. Bara sængurföt.

Maður spyr sig!!!

Frábært! Maður er rétt svo búin að sætta sig við að nóa konfektið, íslenska appelsínið, vatnið og útisundið er ekki til í Danmörku. Maður er við það að taka Haribo, Faxi kondi, kalkvatn og ógeðs innisundlaugar í sátt þegar að þeir snillingarnir í sjónvarpinu sýna einhvern þátt um Ísland.
Jájá, einhverjir danir, sponsaðir af fjallraven bak og fyrir og upp og niður fara í ferðalag til Íslands og gera allt það skemmtilega. Sofa í tjaldi, fara í hvalaskoðun, hestbak, skoða íslenska náttúru, fara í jarðböð, éta ógeðslega girnilegan og djúsí grillmat og ég veit ekki hvað.
Langaði að grenja. Þurfti aðeins að slá mig og minna mig á að það er korter síðan ég kom frá Íslandi og ekki nema 10 vikur í að ég fari þangað aftur.

Samt greinilega ekki allir jafn áhugasamir og ég um að horfa á litla Ísland í danska sjónvarpinu, því þegar ég nefndi þetta við einn vin minn, þá sagði hann "Það eru samt svo flottar kellingar í myndinni á TV3!"
Myndin sem var í gangi þar þegar ég skipti um stöð til að athuga (Já, ég held ég sé að verða lesbísk á að umgangast þessa strákorma.) þá var það myndin Bring it on..again eða eitthvað álíka spennandi.

Bækur

Einu sinni var ég algjör bókaormur. Hakkaði í mig hverja bókina af fætur annari og fór létt með það. Sú er ekki raunin í dag. Ég er alltof löt við að lesa bækur og enn latari við að klára þær. Það er nefninlega þannig með mig að ég byrja á bókunum, les þær alveg á met-tíma þangað til ég er komin að síðustu köflunum. Þá hætti ég bara og byrja oftast á einhverri nýrri bók og sama sagan endurtekur sig. Flestir eiga akkúrat erfiðast með að byrja á því að lesa bækur. Ég hef ekki klárað bók síðan ég man ekki einu sinni hvenær.
Ég var allavega að taka til hérna hjá mér, og fann heilu staflana af bókum, sem ég hef ekki klárað. Og núna er ég akkúrat að lesa Joachim Boldsen -Ærlig talt! Ég er að verða komin um miðja bók og ég er að segja ykkur það, Ósagt eftir Eyvind Karlson ásækir mig í svefni og segir "lestu mig, lestu mig"!
Held það sé bara í lagi að fara að leggja mig inn fljótlega.

Grundómyndir

Myndavélin mín varð eftir á Íslandi, ásamt danska símkortinu mínu, málingardótinu mínu og bara eiginlega öllum fötunum mínum. Svo það eru Grundómyndir í boði Villa bróður (hans JP).
Ég lagið mig alla fram í að vera spastísk á öllum myndunum, ég held að ég sé ekki svona ljót og asnaleg í alvöru sko. Vona ekki allavega.

Frosið vatn

Villi líklega að segja eitthvað voða fyndið

Klifraði yfir hliðið, sem var svo ekki læst!!!!

Kirkjufellið á sínum stað

Grundarfjörður

Bústaðurinn frægi

Ég var svo hot á sleðanum að snjórinn bráðnaði!