Börn alkóhólista

Æj fékk pínu sting í hjartað þegar ég horfði á Kastljós kvöldsins. Pabbi hefði eiginlega alveg eins getað tekið viðtal við mig, ég sá sjálfa mig alveg svakalega í henni Tinnu. Við erum svo sannarlega ekki ein í heiminum, börn alkóhólista.
Hraðfréttirnar eru svo í seinni hluta þáttarins, ögn léttara efni :)

Levis

Ég er svo (ó)heppin að eiga mömmu sem býr í Kanada og á oft leið yfir landamærin til Bandaríkjana. Óheppin vegna þess að ég hitti hana allt of sjaldan, heppin því hún er dugleg að sendast út um allar trissur eftir hinu og þessu góssi sem mig bráðvantar. Um daginn fékk ég til dæmis sent ca 16 stykki af handsápum úr Bath and bodyworks - hver þarf ekki á svoleiðis fíneríi að halda?

Næsta sem mig bráðvantar eru nýjar gallabuxur og þar sem ég er mjög hrifin af Levis Curve ID þá var ég að hugsa um að senda múttu af stað í leiðangur í Levis outlet og finna á mig buxur. Fyrir þá sem ekki þekkja Levis Curve ID þá komu þeir út með þessa línu í fyrra (að ég held) og hún er gerð með það í huga að passa kvennlíkamanum, sama hvort við séum epli, pera, stundarglas eða hvað þetta heitir nú allt. "Designed to flatter a woman's natural shape". Þeir segja að þetta snúist ekki um stærð heldur snið sem passi líkama okkar. Mér skilst að buxurnar komi í þremur gerðum Slight curve, Demi Curve og Bold curve. Ég er til dæmis Demi Curve og svo velur maður bara snið, ég á "slim leg" sem eru bara frekar venjulegar en það er hægt að velja allskonar, skinny, boot cut og svo framvegis. Ég er ekki með nettasta rassinn í bransanum en mér finnst þessar buxur passa mér vel og svo er alltaf kostur þegar buxurnar ná uppfyrir lífbein en mér finnst ekki fallegt þegar konur/stelpur eru í buxum sem ná varla yfir rassaskoruna á þeim. Þessar buxur eru líka til í mjónu stærðum bara svo það sé á hreinu, þetta eru sem sagt ekki einhverjar bollubuxur ;)
Mér finnst svo gaman að Levis sé komin út með þessa línu, ég hef alltaf verið mjög hrifin af gallabuxunum þeirra en bara dáðst að þeim í fjarska svo það er gaman að eiga loksins svona fínt. En ég er líka bara svo hrifin af þessari línu því það eru ekki allar konur vaxnar eins og 14 ára fermingardrengir eins og margir gallabuxnaframleiðendur virðast halda.

Mæli með að skella sér í mælingu, það var alveg ótrúlega almennileg stelpa sem afgreiddi mig og mömmu þegar við fórum og létum mæla okkur. Ljóshærð stelpa, hávaxin og var í Levis búðinni í kringlunni. Þið megið samt ekki vera feimnar við þetta og reynið að sjá það fyndna í þessum aðstæðum þegar þið troðið ykkur í buxur sem þið eruð vissar um að séu tveimur númerum of litlar ;)
Þetta er status sem ég skrifaði á facebook þegar ég var komin heim í nýjum buxum:

Ég og afgreiðslustúlkan í Levis í Kringlunni áttum saman huggulega stund í mátunarklefanum í dag. Ég lá á gólfinu meðan hún tróð mér í níðþröngar brækur og svo tókst okkur í sameiningu að renna upp og hneppa. Hún sannfærði mig um að brækurnar myndu víkka svo nú sit ég hér hamingjusöm í rándýrum nýjum buxum, með kramið móðurlíf og næ ekki andanum! En mjög hamingjusöm með nýju buxurnar því þær eru jú Levis!!

Kona fer til læknis

Spurning um að henda inn smá bloggi. Það hefur ekki mikið gerst síðustu vikuna þar sem ég hef þurft að halda mig mest megnis heima vegna furðuflensu. Ég er enn að berjast við að drukkna ekki í eigin hori og tala þar af leiðandi eins og æðstistrumpur. Gaman að því.

Fór til læknis í síðustu viku útaf einhverjum breytingum í öðru brjóstinu. Vissi að læknirinn okkar hér á Hjara væri ekki við svo mér datt ekki annað til hugar en að það væri einhver miðaldra krúttlæknir í gallabuxum og hlaupaskóm (eða klossum, það er ekki hægt að vera læknir án klossa) að leysa af. En nei, daginn sem ég fer til læknis til að láta skoða á mér brjóstin (ég fer mjög sjaldan til læknis og hvað þá útaf einhverju öðru en til að fá nýjan skammt af ofnæmislyfjum) er Brad Pitt að leysa af á Hjara Veraldar. Drepið mig ekki! Okei, kannski ekki Brad Pitt en ég myndi alveg segja að þetta hafi verið semí Dr. McDreamy, eða allavega ekki miðaldra krúttkall í gallabuxum og hlaupaskóm heldur svona þrítugur, myndar drengur, huggulegur til fara og tjah bara alls ekki það sem ég átti von á.

Nú þar sem hann birtist í dyrunum og kallar nafnið mitt þá fór margt í gegnum huga minn. Fyrsta var að hlaupa út - veit ekki af hverju ég hætti við það, virðist fín hugmynd þegar ég pæli í þessu núna eftirá.  Annað var að þykjast ekki heyra/þykjast ekki heita Kristín Alma - það hefði ekki gengið upp vegna þess að konan í móttökunni veit hvað ég heiti og hver ég er. Þriðja var að finna uppá einhverri annari ástæðu fyrir að ég væri mætt til læknis, datt mér þá helst í hug að þykjast vera með verk í hnénu - var fljót að eyða þeirri hugsun þegar ég fattaði að ég væri víst með órakaðar lappir og ég gæti nú ekki farið að ota svoleiðis órækt að greyið drengnum.

Ekki datt mér eina sekúndu í hug að þykjast bara vera komin til að láta hann tjékka á þessari flensu/kvefi/whatever sem ég var þegar komin með þarna og það var ekki fyrr en hann spurði mig þegar við vorum búin að stúdera brjóstin á mér í korter hvort ég væri nokkuð lasin? Döhh..

Svo hringdi vekjaraklukkan mín í miðju viðtalinu, mjög classy, en þeir sem þekkja mig vita að ég sef frekar fast svo það er mjög erfitt að vekja mig (fólk hefur líkt því við að reyna vekja einhvern upp frá dauðum) og því er hringitóninn sem vekur mig ekki lag með Michael Buble. Skil reyndar ekki ennþá af hverju vekjaraklukkan hringdi þarna á þessum tíma en það er nú annað mál.

Ég lifði þetta af, get svo sannarlega þakkað fyrir að vera heilbrigð en er sennilega með varanlegt ör á sálinni eftir þessa lífsreynslu og vona að ég þurfi ekki að rekast á kauða aftur í lífinu, en til þess þarf ég að vera dugleg að forðast þyrlu landhelgisgæslunar skilst mér.

Kannski að ég taki líka fram að þessi læknir var mjög almennilegur og virkilega faglegur, ekkert hægt að kvarta undan honum, ég er nokkuð viss um að hann geti lítið að því gert að vera ungur, myndarlegur og ekki í klossum :)

Furðuflensa

Ég er búin að vera í ruglinu síðustu daga og hef ekki einu sinni opnað tölvuna mína, bara mókað í sófanum með iPadinn og sængina. Ákvað eftir að vera búin að éta óhóflegt magn af verkjalyfjum til þess að koma mér í gegnum dagana að hætta þessu rugli, leggjast uppí sófa og vera bara veik. Held að það sé að virka því nú er ég búin að liggja til skiptis uppí rúmi og sófanum frá því seinni partinn í gær og mér líður aðeins betur. Nema andlitið á mér er að springa svo það er spurning hvort hausinn á mér sé fullur af hori.. :)

Fræðingurinn er á sjónum svo ég á einn mjög vanræktan hund. En greyið er búinn að vera svo góður og virðist hafa skilning á þessu ástandi móður sinnar og sættir sig við mjög hægfara og stuttar gönguferðir og mikinn svefn. Hrappur er reyndar sjúkur í sængur og hefur alltaf verið. Hann fær ekki að fara inní herbergin hér heima svo hann er sennilega bara mjög kátur með að fá að liggja í mjúkri sæng allan daginn. Skondin skrúfa.

Tryggasti vinurinn :)

Jebb, jebb. Mikið að gera í skólanum núna. Fyrri lota að klárast núna svo það er mikið um kannanir og verkefnaskil. Ég náði mér í hálsbólgu, höfuðverk og slappleika svona til að vera alveg hress og fersk í lærdómnum. Alveg týpískt þar sem ég verð ALDREI veik! Held ég eigi skilið kók og súkkulaði... ;)

Voff

Nýr hundur í fjölskyldunni. Fengum lítinn cavalier "frænda" um helgina og við fræðingurinn viljum helst flytja inn til mákonu minnar og fjölskyldu, svo spennt erum við.
Hrappur fékk að hitta Astró litla í kvöld og það gekk ótrúlega vel enda einstaklega prúðir hundar hér á ferð...

Ég með Astró og Bjarma bróðir hans

Hrappur og Astró að hittast í fyrsta sinn

Góð geymsla fyrir naglalökk..

Jæja eins og áður hefur komið fram þá voru naglalökkin mín og bara það sem fylgir nöglum almennt að sprengja af sér baðskápinn. Svo ég ákvað að mála kryddhillu úr IKEA hvíta og skella öllu nagladótinu í hana. Á eftir að hengja herlegheitin upp, en það verður gert þegar bjútíhornið mitt verður græjað (sem fyrst því Fræðingurinn minn er pínu þreyttur á hálsmenum, hárspennum, varaglossum og öðru góssi útum allt hús).

Ég er ánægð með útkomuna og fannst ég ansi sniðug þarna! Þetta varð líka til þess að ég tók rækilega til í safninu góða og fækkaði lökkunum um heilan helling - nú get ég farið að kaupa fleiri :)

Þessi hilla kostaði heilar 795kr og ég gat sett hana saman sjálf!

Málað á eldhúsgólfinu :)

Lét skrautlímband á hilluna því mér fannst það fallegra

Ég er sjúk í skrautlímbönd...

Nude Home

Ég er bara pínu ánægð með fyrsta eintakið af Nude Home sem kom út í dag. Mér finnst þessi vefútgáfa bráðsniðug en verð að viðurkenna að mér finnst mikið betra að setjast niður með tímarit í höndunum og lesa. Eins með bækurnar, er ekki að gúddera þetta Kindle dæmi, vil bara hafa bók í höndunum og flett blaðsíðum og brett uppá hornin þó það sé bannað! Ég er svo níræð inní mér.
En blaðið er fínt, hvort sem ég sé níræð eða ekki :)

Mosi

Mér finnst þessi baukur svo sætur. Væri til í að eignast hann. Tilvalinn undir ferðasjóðinn :)

Kaupmannahöfn

Ég vaknaði eitthvað öfugsnúin eins og svo oft á mánudögum. Ákvað samt að láta daginn ekki allan fara í mánudagsfýlu og pirring yfir veðri svo ég bókaði flug til Kaupmannahafnar fyrir okkur Byggingarfræðinginn í desember.
Þetta var kannski ekki alveg svona, við erum búin að vera á leiðinni til DK lengi og ákváðum núna um daginn að skella okkur út í jólafríinu. Ætlum að gista á hóteli og ákváðum að vera ekki alveg á einhverju farfuglaheimili svo við ætlum að prufa hotel twenty seven sem er nýtt/nýlegt hótel á mjög góðum stað í borginni. Hlakka til að prufa þetta.
Hvað er svo must að gera/skoða/borða/drekka/kaupa í Kaupmannahöfn? Hvar eru bestu Genbrugsbúðirnar og Tyrkjabúllurnar? Ef einhver sem hefur búið í/komið til Horsens les þetta og þekkir til í Köben (halló Stjáni frændi) hvar er hægt að fá pizzur eins og á Delons?!

Við Byggingarfræðingurinn kynntumst í bænum Horsens á Jótlandi og bjuggum þar í nokkur ár áður en við fluttum hingað á Hjara Veraldar, við erum því ekki að fara í túristaferð heldur meira svona nostalgíuferð einhverja. Byggingarfræðingurinn ætlar í THansen, Harald Nyborg og Bilka meðan ég fer í H&M, Genbrug og Bahne. Svo ætlum við í Tivoli, fá okkur tómatsnakk, tivolistangir, McDonalds og Tyrkjabúllukebab.
Æj kannski ekki alveg, ætlum bara að njóta lífsins saman og tala dönsku :)

Naglalakk

Ég keypti mér um daginn segul naglalakk. Það virkar þannig að maður lakkar neglurnar með venjulegum hætti og heldur þar til gerðum segli yfir nöglinni í smá stund - held samt alveg 30 sekúndur og það kemur munstur á neglurnar. Þetta segul-lúkk er ekki alveg minn stíll svo ég sleppi segulpartinum. Liturinn er alveg rosalega fallegur og mér finnst hann einmitt eiga vel við haustið þegar dekkri neglur taka við af björtum og neon lituðum nöglum sumarsins. Lakkið er frá Depend og er númer 6009. Þið fáið mynd, en það ber að taka fram að ég er ekki nagla/handamódel ;)

Skrifstofa

Ég ætla að fara að koma upp skrifstofuaðstöðu í öðru hvoru gestaherberginu. Það gengur ekki lengur að hafa borðstofuborðið undirlagt af tveimur fartölvum, skóladóti og fleiru sem fylgir okkur Byggingarfræðingnum. Ekki mjög smart og engin ástæða til þar sem við búum í frekar stórri íbúð (amk miða við að við erum tvö) með tvö auka herbergi sem eru aldrei notuð.
Við erum sem sagt með tvö gestaherbergi sem eru mjög lítið notuð (hint til fjölskyldu og vina um að koma í heimsókn) og ég væri til í að leggja annað undir smá heimaskrifstofu. Það má alltaf bara skella dýnum á gólfið ef allt skyldi fyllast af næturgestum. Það væri líka gott fyrir mig að geta lokað mig af og lært þar sem ég missi auðveldlega einbeitninguna - nett ADHD alltaf í gangi hjá mér!
Hér er smá listi yfir það sem mér er búið að detta í hug varðandi litlu skrifstofuna okkar og svo nokkrar myndir fyrir smá innblástur.

• Finna fallegt skrifborð. Helst gamalt og gera upp
• Koma upp hillum
• Finna sniðuga leið til að geyma geisladiska og DVD - mér finnst mjög ljótt að hafa þetta fyrir allra augum
• Væri til í að "krítatöflu" mála fyrir ofan skrifborðið eða bara græja svoleiðis með gömlum ramma og smá "krítartöflumálingu"
• Setja upp prentarann þannig að það sé ekki vesen að prenta út, eins og núna þegar skrifstofan er á borðstofuborðinu. Ég prenta mikið út þegar ég er að gera kökur þannig að það er eins gott að ég geti prentað út einn tveir og þrír :)
• Kaupa fallegan stól við skrifborðið, helst ekki svona týpískan skrifborðsstól
• Gera ráð fyrir bókahillu. Bækurnar okkar eru frammi á gangi eins og er en það stendur til að gera skáp þar þannig að bókasafn heimilisins þarf að flytja!
• Koma skipulagi á hina ýmsu hluti
• Lýsing
• Finna fallega mottu á gólfið til að fá smá hlýleika í herbergið - eða til að fullnægja mottusýkinni sem hrjáir mig þessa dagana.. 

 Svo er hér póstur um "smá" skrifstofu makeover hjá Skreytum hús. Þið getið fundið fleiri færslur um skrifstofuna hjá henni undir "skrifstofa" í "flokkar" þarna öðru megin á síðunni.

Inspiration of the day

Ég er ekki mikil tískudrottning. Allavega ekki svo að ég þurfi að fylgjast með því sem hefur verið að gerast á tískuvikunum undanfarið. En ég veit alveg hvað mér finnst flott og hér er smá dæmi um það :)

Elska þennan vínrauða lit

Love á vínrautt, leður og dýramynstur

Elsk á allt. Úrið, jakkann, klútinn, sólgleraugun og hárið!

Opi Oktoberfest

Verð að skella í einn góðan trefil!

Casual en samt smart

Held að næsta mál á dagskrá sé að fá sér prjónapeysu, blazer jakka, eitthvað vínrautt, góðan trefil, flott stígvél og Ray Ban aviator. Eða bíða með það þar til í útlöndunum í jólamánuðinum...

Drip dry OPI

Mig langar svo að prufa þetta Drip Dry dæmi. Setur 1-2 dropa á neglurnar þegar þú ert búin að setja naglalakk á þær og lakkið þornar! Ef þetta virkar þá ætti þetta nú að hennta svona brussulínu eins og mér ágætlega. Verð að kíkja á þetta í næstu bæjarferð. Geri ráð fyrir að þetta kosti um milljón eins og allt frá OPI, en kannski þess virði :)
Langar líka í ný falleg naglalökk og svo þyrfti ég að fá mér einhverja sniðuga hirslu undir nagladótið mitt sem er að sprengja utan af sér baðskápinn! 

Kross

Hef séð svolítið mikið af þessum hálsmenum uppá síðkastið. Þó ekki í búðum heldur um hálsinn á stórstjörnum í Hollywood. Mér finnst þetta agalega smart, sérstaklega lítil og nett úr gulli eða rósagullinu góða (ég er ekki enn búin að eignast neitt úr rósagulli!!!).
Hvar fær maður svona fínerí á Íslandinu góða?

Sko til, Kourtney Kardashian klikkar ekki!

Kökur

Æj mér finnst svo gaman að dúllast í kökubakstri og skreytingum. Hér er brot af því sem ég hef verið að dúllast í...

Hello Kitty

UMFG kaka fyrir einn harðan stuðningsmann :)

Brjóst!! 

Batman forever

Spiderman

Afmæliskaka fyrir eina 10 ára skvísu.

BLóm og hjörtu

Skírnarcupcakes

Mikki mús alltaf klassískur

Skírnarcupcakes

Þriggja hæða afmæliskaka með rósum og fiðrildum

Dásemd!

Mér finnst þetta viðtal algjört yndi. Það er eitthvað við tvíbura sem heillar mig, alltaf þótt eitthvað agalega sjarmerandi við að eignast tvö börn í einu. Held það sé alveg frábært. Hinsvegar myndi ég labba í sjóinn ef ég myndi eignast tvö börn með mjög stuttu millibili. ok ekki í alvörunni :) Börn eru alltaf blessun, það er nú bara þannig.

Bollakökur

Ég fæ oft spurningar um hvernig ég nái bollakökunum svona "beinum" sem sagt formið heldur sér alveg og þær "leka" ekki út um allt og verða skrýtnar í laginu eins og vill gerast. Svo ég ætla að sýna ykkur hvað ég geri þegar ég baka bollakökur/muffins/cupcakes - hvað þið viljið kalla þetta :)

 Ég nota alltaf svona sílikonmót. Fást í Hagkaup.

 Set venjuleg pappírs muffinsform ofan í

 Þessir einnota sprautupokar fást í Hagkaup - í pokadeildinni :)

Deigið komið í sprautupoka. Síðan þarf bara að klippa aðeins af endanum og sprauta ofan í muffinsformin. 

Deigið komið á sinn stað. Mér finnst þetta mikið snyrtilegri aðferð en að nota tvær teskeiðar. Líka mikið fljótlegra sem er gott, sérstaklega þegar maður þarf að gera mikið magn.

 Kökurnar komnar útúr ofninum voða jafnar og fínar. Þá er bara að skreyta!

 Afurðin fullunnin og á leið í 10 ára skvísuafmæli hjá litlu frænku Byggingarfræðingsins :)

Krúttkaka!